Къыркъаууз (сентябрь) айны 6-да Къарачай-Черкесияны кюню бла Черкесск шахарны 200-джыллыгъына аталгъан къууанч ингирде шахарны ара майданында «Всем сердцем с тобой, мой город родной» деген концерт кёргюзюлдю.

Концертге Москвадан, Санкт-Петербургдан, Къазандан, Шимал Кавказны регионларындан келген артистле, Къарачай-Черкесияны джырчылары къошулгъандыла. КъЧР-ни махтаулу артисти Артём Разин концертни республикан аралыкъны гимни бла – «Это мой дом, Черкесск» джыр бла – ачды.
Концертге хар ким да бек сюйген артистле къошулгъандыла – КъЧР-ден Эдиланы Руслан, Ингушетияны халкъ артисти Лема Нальгиева, Дагъыстанны махтаулу артисти Ринат Каримов, халкъла арасы вокал конкурсланы лауреаты, Эресейни уллу этнофестивалларына къошулуб тургъан Elena Jaya, «Голос» телепроектге къошулгъан Игнат Изотов, РФ-ны маданиятыны махтаулу къуллукъчусу Анатолий Пянзинни башчылыгъы бла Ставрополь кърал филармонияны «Слобода» деген вокал-тепсеу ансамбли, Аслан Тлебзу, Астемир Апанасов, Ачар Меремкулов, Артур Халатов, Марад Байкаев дагъыда башхала.
Джыйылгъан джамагъатны аллында КъЧР-ни Башчысы Темрезланы Рашид сёлешгенди. Башчы Черкесск шахарны юбилейи РФ-ны Президенти Владимир Путинни Указына кёре белгиленнгенин, республикада джашагъан миллетлени арасында шохлукъну бегитиуде КъЧР-ни ара шахарыны тарих магъанасы болгъанын чертгенди.
«Бизни шахарыбыз гитче станседен Эресей Федерацияны субъектини ара шахарына дери ёсгенди. Ол, сёзсюз да, ата-бабаларыбызны кючлери бла болгъанды. Ала бизге Уллу Хорламны саугъа этгендиле, кече-кюн демей урунуб, шахаргъа айбат тюрсюн алдыргъандыла. Бюгюнлюкде да джердешлерибиз, джигитлик таныта, Эресейни эркинлигин джакълайдыла.
Хар биригиз да республикагъа, аны ара шахарына ёсюм алдырыб кюрешесиз. Барыгъызны да байрам бла алгъышлайма. Къралыбызгъа, республикабызгъа, шахарыбызгъа да рахатлыкъ, мелхумлукъ теджейме», – дегенди Темрезланы Рашид.
Концертге къараргъа кёб адам келген эди. Ала сюйген джырларына тынгылаб, тепсеулеге къараб заманларын зауукълу ашыргъандыла.
Къыркъаууз айны 7-де уа «Нарт» стадионда Республиканы кюнюне эмда Черкесск шахарны 200-джыллыгъына аталыб, уллу къууанч джыйылыу бардырылгъанды. Анга 10 мингден аслам адам къошулгъанды.
Къууанч джыйылыугъа Шимал Кавказ федерал округну регионларындан, Къыбыла Тегейден, Абхазиядан делегацияла келген эдиле.
Джыйылыуну официал кесеги бошалгъанындан сора белгили артистле, тепсеу коллективле «Нарт» стадионда джарыкълыкъ программаларын теджегендиле.
Алайды да, бюгюннгю Эресейни тин байлыгъына, Къарачай-Черкесияны тарихи, маданияты, табигъаты бла байламлы хапарлагъа, назмулагъа кёре хазырланнган сахна оюн кёргюзюлгенди. Ызы бла Черкесск шахарны тарих бетлерин, джетишимлерин суратлагъан эпизодла теджелгендиле. Ол кёзюуде сахнаны «Тодес» шоу-балетни артистлери, республиканы сабий тепсеу ансамбллери джарытыб тургъандыла.
СВО-ну ветеранларына уа джыйылгъан джамагъат сый бериб, джарыкъ тюбегенди. Алай бла, Ата джуртубузну къоруулагъан джигитлеге разылыкъ билдиргендиле.
Байрамгъа къралыбызны белгили артистлери – Дима Билан, Александр Олешко, Юлиана Караулова, Игнат Изотов, Александр Еловских – къошулгъан эдиле. Ала джырлары бла джыйылгъанланы къууандыргъандыла. Сахнагъа Къарачай-Черкесияны артистлери да чыкъгъандыла. Ала да халкъ бирликге, Ата джуртха сюймекликге аталгъан джырланы джырлагъандыла.
Джыйылыуну ахырында Александр Еловских «Город у самого неба» деген джангы джырын джырлагъанды. Ол аны Черкесск шахарны 200-джыллыгъына атаб джазгъанды.
Къууанч ишле фейерверк бла тамамланнгандыла.

Салпагъарланы Умар.