Къыркъаууз (сентябрь) айны 6-да, Къарачай-Черкесияны кюнюне, Черкесск шахарны 200-джыллыгъына эмда Уллу Хорламны 80-джыллыгъына аталыб, «Юбилей Победы – Юбилей столицы» деген джаш тёлю патриот фестиваль бардырылгъанды.

Фестивалны КъЧР-ни Джаш тёлю ишлерини хакъындан министерствосу бла «Авангард» деген джаш тёлю аралыкъ къурагъандыла. Анга бир мингден аслам адам къошулгъанды. Фестивалны тамалында 11 станция къуралгъан эди. Аланы хар биринде бирер тюрлю зат этерге юрете эдиле. Сёз ючюн, бир джерде ауругъаннга, къыйын болумгъа тюшгеннге биринчи болушлукъ этиуден джаш тёлюге мастер-класс кёргюзюлдю. «Волонтёры Победы» станцияда джау чыракъла этерге юрете эдиле.
«АК-74» автоматны чачыб джыяргъа юретген станциягъа, электрон халда къара атхан джерге (тир) джаш адамла сюйюб баргъанлары таныла эди. Аны бла бирге алайда техниканы джашырыргъа джарагъан ауланы (маскировочные сети) эшиуден мастер-класс да кёргюзюлгенди.
Байрамгъа къошулгъанла суратха тюшерча джерле да джарашдырылгъан эдиле. «Рисуем Родину» деген станцияда уа джаш адамла сурат салыуда фахмуларын танытхандыла. «Авангард» деген джаш тёлю аскер-патриот аралыкъны ишин суратлагъан станциягъа да кёб адам къарагъанды.
Аны бла да къалмай, джаш адамла, тюрлю тюрлю оюнлагъа къошулуб, билимлерин, усталыкъларын сынагъандыла.
Бу фестивалны юсюнден КъЧР-ни Башчысы Темрезланы Рашид кесини «МАХ» мессенджерде каналында: «Фестивалда джаш тёлюню патриот сезимлерин ёсдюрюу бла байламлы ишле интерактив халда теджелгендиле. Анга джаш адамла сюйюб къошулгъандыла. Тири граждан ангылары болгъан патриотланы ёсдюрсек, бизни киши да хорлаяллыкъ тюлдю», – деб джазгъанды.

Биченчиланы У.