Байрам кюнлени аллы бла Черкесскени Первомай орамында «Из истории города» деген сурат кёрмюч къуралгъан эди. Анда хронология халда шахарны тарих джолу ачыкъ кёрюнеди.

Андан узакъ болмай, ара паркны къыйырында, «…Было… стало» деб дагъыда бир кёрмюч къуралгъанды. Шахарны эски мекямларыны, орамларыны, тийрелерини суратларыны къатында джангыланы, бюгюннгю заманнга келишгенлени суратлары тагъыладыла. Кеслери да алай сансыз мекямла тюлдюле ала, Черкесскени инфраструктурасын къурагъан объектледиле. Кёрмючню къурагъанла таб лагъым табхандыла: эски бла джангыны тенглешдириб барыргъа къарагъан кёзге таб болады.
Бу кёрмючню къурагъан республикан музейни-заповедникни къуллукъчуларыдыла. Сау болсунла, уллу къыйын салгъандыла дегенни айтыб, къарагъан адамла бюсюреу этиб кетедиле. Аны бла да къалмай, музейни сурат галереядагъы кёрмючню да байрам кюнледе эшиклери ачыкъ эдиле.
Первомай орамдагъы кёрмючге музейни илму къуллукъчусу, тарихчи Батчаланы Шамиль, суратланы хар биринден толу хапар айтыб, байрам кюнледе алайгъа келгенлеге шахарны тарихине «экскурсия» этдириб тургъанды.

Ёзденланы Якъуб.