Къыркъаууз (сентябрь) айны 7-де Черкесск шахарны Первомайская орамыны адамла джаяу джюрюучю джерлеринде да къууанч ишле бара эдиле.

Алайда гоккала бла кюрешгенле (флорист), кофейняланы келечилери, кондитерле къошулгъан фестиваль-конкурс ётдю. Ала шахарчыла бла къонакълагъа усталыкъларын кёргюздюле, татлы затла бла сыйладыла.
Алайдан узакъ болмай «Кавказский карнавал» деген фестиваль да бардырылды. Анда Къарачай-Черкесияны джер-джеринден келген тепсеу коллективле, чемерликлерин кёргюзюб, джамагъатны къууанч сезимлеге бёледи. Ариу кийимле, халкъ эмда башха тепсеуле байрамгъа бир тюрлю хал бере эдиле.
Къарачай-Черкесияны
«Эльбрус» кърал тепсеу ансамблини тамадасы Байрамкъулланы Исмаил, «Кавказский карнавал» деген фестивалгъа къошулгъанланы алгъышлаб, кубокла бла грамотала берди. Саугъаланнганланы арасында Шимал Кавказ кърал академияны «Снежные вершины» деген ансамбли, «AZAT», «Шам Теберди», «Чинар», «Единство народов», «Салам» ансамблле, «VALERI» деген тепсеу бла спорт студия, «Break Dance» коллектив, «Бит Студио», «Калибри» тепсеу къауумла, «Радуга» студия бар эдиле.

(БИЗНИ КОРР.).