Россия Федерацияны Президентини  Шимал Кавказ федерал округда Толу эркинликли келечиси Белавенцев Олег Пятигорск шахарда регионну курортларыны тау лыжа кёзюуге хазырлыкълары бла аланы андан ары ёсдюрюуню  юслеринден бардыргъан джыйылыугъа Къарачай-Черкесияны Башчысы Темрезланы Рашид  да къошулгъанды.

Ол джыйылыуда Туризмни федерал агентствосуну тамадасыны заместители Конюшков Алексей да болгъанды.
Белавенцев Олег, джыйылыуну ача:
- Шимал Кавказ федерал округну субъектлерини бары да, хауалары таза, джумушакъ, табигъатлары ариу болуб, къар терен тюшюб, тау лыжа спортну кенг джаяргъа таб джерледиле. Алай а тау лыжалада учуучула, кёб санда келиб, зауукълу  солур ючюн, ол курортлада не таблыкъ да къуралыргъа керекди. Туризм округну баш санагъатларыны бири къуру ол заманда   болаллыкъды, - дегенди.


РФ-ны Президентини округда Толу эркинликли келечиси айтхандан, къралны башчылыгъы ол излемни толтуруугъа багъышлаб талай магъаналы бегим алгъанды. Юлгюге да РФ-ны Президентини аманаты бла округну территориясында джангы курортла ишлеуню проекти толтурула тургъанын айтханды. Ол курортла, бусагъатхы медицина керекле бла баджарылыб, дуния дараджалы солуу-багъыу учреждениеле боллукъдула. Алада тау лыжа спорт да уллу орун аллыкъды. Быйылны январь айында къралны башчысы Правительствону членлери бла бардыргъан джыйылыулада Шимал Кавказны инфраструктурасын керекли дараджагъа чыгъарыб, 2021-чи джылгъы къыш курортланы  бири этерге борч салгъанды.  РФ-ны Правительствосуну Председатели Медведев Дмитрий да, Правительство комиссияны быйыл мартда Ессентуки шахарда болгъан джыйылыуунда округну социал-экономика ёсюмюню джашау магъаналы ишлерин сюзюб, толтурургъа керекли джумушланы белгилегенди.
- Ол джыйылыуда Правительствону Председатели Медведев Дмитрий билдиргенден, арт эки джылда туристлени тау лыжа секторгъа келиб солуулары  500 минг адамгъа ёсгенди. Алай а, ол секторну андан ары ёсдюрюр ючюн, аны инфраструктурасын андан эсе иги этерге, орта класслы джангы къонакъ юйле бла пансионатла, турист базала, медицина болушлукъну, спорт затланы прокатха бериуню объектлери ишленирге керекдиле. Аллай объектле къызыу ишлене да турадыла, - дегенди Белавенцев Олег.
Джыйылыуда туристлени аслам келирлерине тыйгъыч болгъан проблемаланы къоратыуну джолларыны юслеринден да тамамлы сёлешиннгенди.
Къарачай-Черкесияны Башчысы Темрезланы Рашид, анда сёлеше, бизни республика округда къой эсенг, саулай къралда туристле эм кёб келген джерлени бири болгъанын чертгенди. Ол айтхандан, КъЧР-де курортланы ёсдюрюуню ишлери, тохтамай,  таймаздан барыб турадыла. Доммайда, сёз ючюн, тау лыжаны трассаларыны джоллары кенгертилгендиле, келир джыл сыртлагъа къолдан къар тёшеучю система, джангы подъёмник, къонакъ юй  ишлерге белгиленнгендиле.
- Аллыбызда джылда, - дегенди Темрезланы Рашид, - «Развитие внутреннего въездного туризма в России» деген программаны тамалында белгили Мысты суула бла «Архыз» курортну бир-бирлери бла байларыкъ джолла ишлениб тебрерикдиле. Ала ишлениб бошасала, туристле бизни бютеусезон курортларыбызгъа бусагъатдан эсе талай кереге  кёб адам келиб турлукъду.  
Темрезланы Рашид арт кёзюуде республиканы курортларын кенгертиу бла аланы инфраструктураларын игилендириу джаны бла бардырылгъан ишледе тохтаб да сёлешгенди. Республиканы инвестицион проектлерин джашауда толтурургъа таймаздан болушуб  тургъаны ючюн   Туризмни федерал агентствосуну тамадасыны заместители Конюшков Алексейге джюрек разылыгъын да билдиргенди.
Джыйылыугъа къошулгъанла, къараргъа салыннган ишни сюзюуню тамамлай,  Россия Федерацияны Президентини Шимал Кавказ федерал округда Толу эркинликли келечисинде Туризмни юсюнден совет къурауну юсюнден бегим да алгъандыла. Белавенцев Олег айтхандан, ол Совет кенгешиучю орган болуб, анга регионланы барыны да келечилери, аны кибик ишлери туризмни ёсдюрюу бла байламлы къуллукъчуланы бары да кирликдиле.
Сюзюлюрге салыннган ишни юсюнден джыйылыуда РФ-ны Президентини Шимал Кавказ федерал округда Толу эркинликли келечисини заместители Владимиров Максим, РФ-ны Президентини ШКФО-да Толу эркинликли келечисини болушчусу Литюк Николай, Ингуш Республиканы Башчысы Евкуров Юнус-Бек, КъЧР-ни Башчысы Темрезланы Рашид, Терк Башы Тегейни Башчысы Битаров Вячеслав, Дагъыстан Республиканы Правительствосуну Председателини орнунда ишлеген Гамидов Абдусамад, КъМР-ни Правительствосуну Председатели Мусукланы Алий, ШКФО-да Россияны МВД-ны баш управлениесини Тинтиу бёлюмюню тамадасы Горенцев Андрей, РФ-ны Баш прокуратурасыны ШКФО-да управлениесини тамадасы Семенов Александр, Экология, технология эмда атом надзор къуллукъну кавказ управлениесини тамадасы Алхасов Халидбег, Россияны МЧС-ни Къыбыла регионал аралыгъыны тамадасыны биринчи заместители Басов Николай, «Шимал Кавказны Курортлары» деген ОАО-ну баш директоруну заместители Муллабаев Урал сёлешгендиле.
Джыйылыуда айтылгъандан,  Шимал Кавказ федерал округну тау лыжа курортлары 2017-чи -2018-чи джылны къыш кёзюуюнде туристле алыргъа хазырдыла.

 
{jcomments}