Къарачай-Черкесияны аскер-патриот юретиуге джораланнган «Авангард» аралыгъына джюрюген 20 окъуучу Беларусь Республикада Брест шахаргъа атланнганды. Ала анда граждан-патриот мероприятиелеге къошуллукъдула.

Бу джолоучулукъгъа КъЧР-ни Башчысы Темрезланы Рашид кёл бергенди.
– Бизни регионланы арасында быллай ишле бирикмекликге, шохлукъгъа себеблик этгенлерине сёз да джокъду. Ёсюб келген тёлюледе быллай тюбешиуле патриот сезимлени ёсдюргенлери себебли, биз къуру да бу тукъум башламчылыкъгъа джол бергенлей турлукъбуз, – дегенди Къарачай-Черкесияны окъуу бла илму министри Инна Кравченко.
Бизден баргъан сохталагъа къонакъбайлыкъ этгенле ашхы программа хазырлагъандыла. Сабийле кёб затха юренникдиле, сейир джерлени кёрлюкдюле, билимлерин ёсдюрлюкдюле. Аны бла бирге кеслерине джангы тенгле, шохла къурарыкъдыла.
– Бу тукъум тюбешиу ёмюрлюкге сабийлени эслеринде къаллыкъды. Заманларын зауукълу эмда хайырлы ашыргъан сохтала ызларына разы болуб къайтырыкъларына ышанабыз, – деб къошханды Инна Кравченко.
Быйыл бизни къралда Ата джуртну къоруулаучуну джылыды. Ёсюб келген джаш адамлада керти патриот сезимлени ёсдюрюуде бир-бирине къонакъгъа барыуну магъанасы уллуду. Эки регионну арасында джарашдырылгъан кесаматны тамалында Белоруссиядан сабийле бизде солуб кетгендиле, энди бизникиле да алада солурукъдула.