Адетдеча, быйыл да джууукълашыб келген окъуу джылны аллы бла республиканы билим бериу санагъатында ишлегенле кенгешле бардырыб башладыла.
Къыркъар (август) айны 25-де, къошакъ билим бериуню хакъындан «Спутник» деген аралыкъгъа джыйылыб, ала джангы окъуу джылда ишлерин таб къурар амалланы сюздюле.
Устазланы биринчи кенгешлери «Навигаторы детства: от новой философии воспитания к новой философии жизни» деген темагъа болду.
Билим бериу санагъатда ишлегенле бла бирге ол кенгешге ёсюб келген тёлюню ариу халиге юретиуге, сабийлени эркинликлерин джакълаугъа джууаблы кърал къуллукъчула, атала-анала да къошулгъан эдиле.
Алайда КъЧР-ни окъуу бла илмуну хакъындан министри Инна Кравченко, КъЧР-ни Халкъ Джыйылыууну (Парламентини) Илмуну, билим бериуню, маданиятны, джаш тёлю ишлени хакъындан комитетини тамадасы Татьяна Черняева, КъЧР-ни сабий омбудсмени Алакъайланы Мария, КъЧР-ни Джамагъат палатасыны тамадасы Елена Ляшова дагъыда башхала бар эдиле.
КъЧР-ни окъуу бла илмуну хакъындан министри Инна Кравченко, джыйылгъанлагъа хошкелди айта, 2030-чу джылгъа дери сабийлени ариу халиге юретиуге аталыб баджарыллыкъ ишлени толу белгиледи.
Министр устазла эм алгъа сабийлени, джаш адамланы эслерин барыбызгъа да магъаналы затлагъа бёлдюрюрге, аланы патриот ангыларын бегитирге, тин байлыкъларын ёсдюрюрге керек болгъанларын чертди. Ол айтхандан, акъыллы, ариу халили сабийле ёсдюрюр ючюн, джамагъат институтла, юйюрле, школла къысха байламлылыкъ джюрютюрюкдюле.
Хар сабий да таб болумда билим алырча мадарла къураугъа, устазланы усталыкъларын ёсдюрюуге, ашхы сынамны джайыугъа, цифра мадарланы хайырландырыугъа тыйыншлы эс бёлюннюкдю.
«Ариу халиге юретиу ол билим бериуге къошакъ тюлдю, ол аны айырылмазлыкъ кесегиди.
Джууаблылыкъ, башхалагъа сый бериу, келишиулю джашау не болгъанын ангылай, хар сабий да энчи ёсюм ала барырча болум къурау бизни баш нюзюрюбюздю.
Ол джаны бла 2030-чу джылгъа дери белгиленнген стратегия бизге джол тюзете барыргъа джарарыкъды», – дегенди Инна Кравченко.
КъЧР-ни окъуу бла илмуну хакъындан министри, сёзюн бошагъаны бла, озгъан окъуу джыл белгиленнген ишлени тамам джууаблы толтургъан, сабийлени джюреклерине джол табыб, аланы тюз джолгъа салыугъа уллу юлюш къошхан устазланы бир къауумун саугъалагъанды.
Быллай кенгешле къыркъар айны ахыр кюнлеринде шахарлада, районлада да бардырыллыкъдыла. Алагъа къошулгъан устазла, юретиучюле 2025-чи – 2030-чу джыллада школланы, сабий садланы ишлерин таб бардырыргъа джарарыкъ «джол картала» хазырларгъа кюреширикдиле.
