РФ-ны Вице-премьери Марат Хуснуллин Эресей Федерацияны Правительствосуну регионал ёсюмюню хакъындан комиссиясыны кенгешин бардыргъанды. Ол кенгешге КъЧР-ни Башчысы Темрезланы Рашид видеоконференция халда къошулгъанды.
Кенгешде «Инфраструктура для жизни» деген миллет проектни тамалында къуралгъан уллу проектле бла федерал программаланы толтурууну юсюнден сёлешиннгенди.
Анда айтылгъаннга кёре, ол миллет проектни тамалында бизни республикада 101 объект ишленникди.
Кенгешде инфраструктураны джарашдырыугъа деб, РФ-ны казначействосу берген кредитлеге баджарылгъан ишле да сюзюлгендиле.
Темрезланы Рашид Къарачай-Черкесиядан эки проектни юсю бла казначействодан кредит алыргъа тилек къагъыт берилгенин айтханды. Башчы айтхандан, кредит ачхагъа Черкесск шахарда джылыу берген сетле ишленникдиле, Джёгетей Аягъы шахарны Московский тийресинде да система джангыртыллыкъды.
Бу проектле тыйыншлысыча толтурулсала, талай джангы юй хайырланыугъа берилликди, 10 минг адам джылыу бла баджарыллыкъды, джангы иш орунла ачыллыкъдыла.
Башчы сёзюн бошаргъа, кенгешге къошулгъанла алайда огъуна Къарачай-Черкесияны тилек къагъытын къабыл этерге дегендиле.
«Инфраструктураны джарашдырыугъа деб, РФ-ны казначействосу берген кредитлени хайырландырыу бла байламлы аллыбызгъа энтда бир атлам этдик. Теджелген ачханы регионлагъа аллай ишлерин баджарыргъа юлешдик.
Бюгюн ЖКХ-ны джангыртыу, Узакъ Восток бла Арктиканы ёсюмю дегенча ишле бла байламлы проектлеге къарадыкъ. Бютеулей да 19 регионда джашагъан адамланы джашау турмушларын игилендирир муратда 41 миллиард сом джоюллукъду.
Этиллик кёбдю, ишибиз ауурду, белгиленнген джумушланы тохтаусуз баджарыб барыргъа керекбиз. Этген ишигизни файдасын адамла тирилик танытханыгъызгъа кёре кёрлюкдюле», – дегенди РФ-ны Правительствосуну Председателини орунбасары Марат Хуснуллин.
Темрезланы Рашид Вице-премьерге да, Эресейни къурулушну, экономика ёсюмню хакъындан министерстволары бла регионлагъа ёсюм алдырыугъа джууаблы ведомстволарыны келечилерине, келишиулю ишлегенлери, бизни республиканы айныууна тыйыншлы эс бёлгенлери ючюн, разылыгъын билдиргенди.
