Мындан алда Железноводск шахарда РФ-ны Правительствосуну Председателини орунбасары Дмитрий Патрушевни башчылыгъы бла Шимал Кавказ федерал округну АПК-сын айнытыугъа аталгъан кенгеш бардырылгъанды. Башха кърал къуллукъчула бла бирге ол кенгешге Къарачай-Черкесияны Башчысы Темрезланы Рашид да къошулгъанды.
Кенгешде, ашхы сынамны хайырландыра, ШКФО-ну къурамында регионланы эл мюлклерине ёсюм алдырлыкъ инвестицион проектлени тыйыншлысыча толтурууну юсюнден сёлешиннгенди.
Дмитрий Николаевич, Шимал Кавказда эл мюлкню айнытыргъа себеб болгъан ишлени, иги кёргюзюмлени юлгюге келтире, РФ-ны Президенти Владимир Путин 2030-чу джылгъа дери эл мюлк продукталаны чыгъарыуну 25 процентге аслам этерге борч салгъанын чертгенди.
Темрезланы Рашид да Къарачай-Черкесияны эл мюлк санагъаты ёсюм алыб баргъаныны юсюнден хапар айтханды. Республиканы Башчысы бу джылны ал джарымында бизни регионда эл мюлк продуктала чыгъарыу 4,4 процентге аслам болгъанын чертгенди. Темрез улу малчылыкъ 20,1 процентге ёсюм алгъанын, джыйыла тургъан мюрзеу да бусагъатда огъуна былтырны кёргюзюмлеринден 17 процентге кёб болгъанын билдиргенди.
Аны хапарына кёре, быйыл 1100 гектар джерде ёсген, дженгил битим берген терек бачхала да къууандыргъандыла. Бусагъатха 32 минг тонна алма джыйылгъанды.
Республиканы Башчысы бизни регионда этли малланы ёсдюрюу, терек бачхаланы кёбейтиу дегенча ишлеге аслам эс бёлюннгенин чертгенди.
Ол айтхандан, салыннган планнга кёре, 2030-чу джылгъа дери Къарачай-Черкесия иги ёсюм алыб, джыл сайын 73 минг тонна эт бла 300 минг тонна сют чыгъарыб барырча боллукъду. Алай болдурур ючюн, эл мюлкде ишлерик усталаны хазырлау бла АПК-гъа ёсюм алдырлыкъ инвестицион проектлени толтуруугъа тыйыншлы эс бёлюнеди.
КъЧР-де 60 тонна кёгет джыйылыб сакъланырча, керекли джерлеге анда юлешиб ашырырча аралыкъ ишлеу да аллай проектлени бириди.
Къарачай-Черкесияны Башчысы Темрезланы Рашид, бу проектни да, бизни республиканы эл мюлкюне ёсюм алдырыргъа джарарыкъ башха проектлени да толтурургъа кёлтюргючлюк этгенлерин черте, РФ-ны Правительствосуну Председателини орунбасары Дмитрий Патрушев бла Эресей Федерацияны эл мюлкюню министри Оксана Лутха разылыгъын билдиргенди.
