Кёб болмай Къарачай-Черкес Республиканы Башчысы Темрезланы Рашид Къарачай шахар округну мэри къуллукъну джангы толтуруб башлагъан Къушджетерланы Спартак бла тюбешгенди.

Темрезланы Рашид, Къушджетерланы Спартакны Къарачай шахар округга мэр болгъаны бла алгъышлаб, джууаблы къуллугъунда уллу джетишимле теджегенди. «Къушджетер улу, 12 джылны Къарачай муниципал районнга башчылыкъ этиб, кесин этимли устача кёргюзгенди, районну айныууна да уллу юлюш къошханды. Алгъыннгы мэр Орусланы Маратны башламчылыгъы бла Къарачай шахар округга ёсюм алдырлыкъ проектле толтурула турадыла да, джангы мэр, ашхы сынамын, терен билимин хайырландыра, ол ишлени да джетишимли тамамларына ышанама», – дегенди республиканы Башчысы. Тюбешиуде Къарачай шахар округга ёсюм алдырыуну юсюнден сёлешиннгенди. Ушакъда инженер инфраструктураны джангыртыу, кёбчюлюк хайырланыучу джерлени айбат этиу, аскерчиле бла аланы юйдегилерине болушлукъ этиу дегенча ишлени миллет проектле бла республикан программаланы кючлери бла тамамлы баджарыугъа, Къарачай шахар округну социал-экономика болумун игилендириуге айырылыб эс бёлюннгенди. Къушджетерланы Спартак республиканы Башчысына Къарачай шахарда джашагъанланы джашауларын игилендириуге джарарыкъгъа санагъан оюмларын айтханды. Аны айтханын ушатханын билдире, Башчы да: «Баш излемле – РФ-ны Президенти Владимир Путин салгъан борчланы таймаздан толтуруу, джамагъатны джашауун игилендириу, адамлагъа магъаналы ишлеге аслам эс бёлюу. Аны эсге алыб, Къушджетерланы Спартак тутхан ишин деменгили баджарлыгъына базама», – дегенди.