Эресейни МВД-ны Хабезде районла арасы бёлмюне Инжич-Чукун элде джашагъан 34 джыл болгъан тиширыу тарыгъа баргъанды. Ол айтханнга кёре, никкол (июнь) айны 20-да анга биреулен къонгурау къагъыб: «Мен почтаны къуллукъчусума. Сизни атыгъызгъа посылка келгенди, аны алыр ючюн СМС бла келген кодну айтыргъа керексиз», – дегенди.

Ол анга ийнаныб, кодну айтханды. Андан сора тиширыугъа кредит заявкала бла байламлы билдириуле келиб тебрегендиле. Аны амалтын ол «Госуслуги» порталда аккаунтун джабханды. Алай болса да, аманлыкъчыла тиширыуну 474 100 сомун кючлегендиле.
Полицияны къуллукъчулары терслеу иш ачхандыла. Аманлыкъчыны ачыкълаб, джууабха тартыр ючюн, тинтиуле бардырадыла.
Кёб болмай аманлыкъчыла Къарачай шахарда джашагъан 37 джыл болгъан тиширыуну да алдагъандыла. Аны бла байламлы, тиширыу полиция бёлюмге барыб, тарыгъыу джазгъанды.
Тиширыу айтхандан, мессенджерде ол танымагъан биреулен маркетплэйсни менеджериме деб, анга онлайн иш теджегенди. Тиширыу анга ийнаныб, 750 сом джибергенди. Аны ючюн тиширыугъа 1200 сомну ызына ийгендиле. Ол кюн огъуна тиширыугъа товарла сатыб ал деб иш бергендиле. Ол да 2180 сомгъа сатыу этгенди. Аны ючюн анга саугъагъа 3864 сом бергендиле. Алай бла, тиширыу аманлыкъчыланы айтханларын эте, 90 130 сомну джибергенди. Андан сора «менеджер» байламлылыкъгъа чыкъгъанын къойгъанды. Тиширыуну ачхамы къайтар дегенине да джууаб къайтармагъанды, аккаунтуна да блокировка этгенди.
Бюгюнлюкге бу ишни юсю бла терслеу иш ачыу бла байламлы оноу этиле турады. Полиция аманлыкъчыланы ачыкълау бла кюрешеди.
КъЧР-ни МВД-сы республикада джашагъанланы энтда бир кере сакълыкъгъа чакъырады. Танымагъан номерледен келген къонгураулагъа, СМС-леге джууаб къайтармагъыз. Эсигизде болсун, билмеген адамларыгъызгъа ачхагъызны ашырмагъыз. Аманлыкъчыланы айтханларына ийнанмагъыз.

КъЧР-ни МВД-ны пресс-къуллугъу.