Къарачай-Черкес Республиканы спортчусу Къозбаланы Динислам «Первенство ЦС ФСО профсоюзов России» деген боксдан саулай Эресейде бардырылгъан эришиуледе 14-15 джылгъыланы арасында хорлаб, биринчи орунну алгъанды.

«Къозбаланы Динислам 46 килограмм ауурлукъда боксдан эришиулеге къошулгъанды. Беш адам бла къарыуун сынаб, аланы барын да хорлагъанды. Ол джетишимле анга, Александр Аксеновну эсгериуюне аталыб саулай Эресейде бардырыллыкъ эришиулеге путёвка алыргъа мадар бергенди», – деб чертгендиле КъЧР-ни Физкультура бла спортдан министерствосуну пресс-къуллугъунда.
Спортчуланы Чекунланы Арсен бла Джандубаев Альберт хазырлагъандыла.
Быллай эришиуле къыркъар (август) айны 10-дан 17-не дери Суворовка станседе бардырылгъандыла. Ол турнирге къралны 28 регионундан 277 спортчу къошулгъан эди.
«Первенство ЦС ФСО профсоюзов России» деген боксдан джаш тёлюню арасында спорт эришиуле къралны эм белгили турнирлерини бирине саналадыла. Анда хорлагъанла, ёчлю орунланы алгъанла Александр Аксеновну эсгериуге аталыб бардырыллыкъ Эресейни биринчилигине къошулургъа мадар табадыла.

(Бизни корр.).