Къыркъар (август) айны 18-ден 21-не дери Къарачай-Черкесияда «Больше чем путешествие» деген турист слёт ётгенди.

Бизни республика «Больше чем путешествие» деген федерал проектде хорлагъан 10 регионну тизимине киреди. Къарачай-Черкесия Шимал Кавказ федерал округда быллай слёт бардырылгъан джангыз регионду.
Слётха Шимал Кавказны регионларындан эмда къралны башха субъектлеринден джыллары 18-ден 35-ге дери болгъанла къошулгъандыла. Ала, къыр-къар айны 18-де «Спутник» аралыкъда регистрацияны ётюб, Тебердиге атланнгандыла. Джаш адамлагъа футболкала, бейджле, суу шышала бла сумкала берилгендиле.
Джаш адамлагъа деб Тебердиде окъуу эмда экскурсия программала къуралгъан эдиле – тюрлю-тюрлю мастер-класслагъа, эришиулеге, проект ишлеге къошулгъандыла, Теберди миллет паркны ариу джерлеринде айланнгандыла. Патриотизмге, тарихни сакълаугъа, граждан джууаблылыкъны ёсдюрюуге уллу эс бёлюннгенди. Алай бла, джаш адамла Кавказны ауушларын къоруулагъанлагъа аталгъан музейге-эсгертмеге баргъандыла.
Слёт къыркъар айны 21-де тамамланса да, аны программасында РФ-ны Кърал байрагъыны кюнюне аталгъан ишле болгъандыла.
«Больше чем путешествие» деген слёт Шимал Кавказны джаш тёлюсюн бирикдиреди, алагъа бир-бирин таныргъа, бир-бири бла шохлукъ джюрютюрге мадар береди.

САЛПАГЪАРЛАНЫ Умар.