Бу кюнледе Къарачай-Черкесияны физкультура бла спортну хакъындан министри Ёзденланы Рашид «ТАСС Кавказ» деген регионал информацион аралыкъда журналистле бла ачыкъ ушакъ этгенди.

Ёзден улу журналистлеге КъЧР-де ишленнген, джангыртылгъан спорт объектлени саны арт 10 джылны ичинде 150-ге джетгенин, Черкесскеде ишлене тургъан ФОК-ну къурулушу да 2026-чы джылны ахыр сюремине тамамланныгъын айтханды.
Министр 2026-чы джыл Къарачай-Черкесияда Белоруссияны келечилери бла гандболдан, футболдан эришиуле ётериклерин да сагъыннганды.
Ёзденланы Рашид айтхандан, бизни республикада спортну ёсюмюне орта тергеу бла бир джылгъа 500 мелиуан сом джоюлады. Ол ачхагъа этилген ишлени себебинден, санларын чыныкъдырыугъа эс бёлюб башлагъан адамланы саны озгъан 6 айны ичинде 60 процентге аслам болгъанды.
Бусагъатда баш джумушланы бири уа СВО-ну ветеранларына реабилитация этдириудю.
Аланы саулукъларын тюзетиуге тыйыншлы эс бёлюр мурат бла республикада кёб иш этиледи.
«Бизни регионда санларын кереклисича джюрютюр хыйсаблары болмагъан адамлагъа джораланнган школ барды. Аны хар неси да джарашыбды. Бусагъатха дери ол школгъа сакъатлыкълары болгъан джердешлерибиз джюрюучен эдиле. Энди СВО-ну ветеранлары да джаралы болгъанлары бла байламлы инджиулерин анда тюзетирикдиле. Алагъа джараулу керекле ала турабыз», – дегенди Ёзден улу.
Министр чертгенден, СВО-ну 100 ветераны бусагъатда огъуна Къарачай-Черкесияны спорт учреждениелеринде реабилитация ётеди. Аланы сабийлери да спорт учреждениелеге хакъ тёлемегенлей джюрюйдюле.