Элия (июль) айны 30-да Къарачай-Черкесияны Башчысы Темрезланы Рашид Кремлде Эресей Федерацияны Президенти Владимир Путин бла тюбешгенди.
Темрез улу тюбешиуде къралны Президентине бизни регионда социал-экономиканы ёсдюрюу бла байламлы баджарылгъан ишлени, СВО-гъа къошулгъан аскерчилеге, аланы юйдегилерине этилген болушлукъну, Уллу Хорламны 80-джыллыгъы белгиленнген, Ата джуртну джакъчыларыны джылы деб баямланнган джыл джаш тёлюню патриот ангысын бегитир мурат бла бардырылгъан ишлени юслеринден толу хапар айтханды.
Владимир Путин бизни регионда бюджет политика иги бардырылгъанын, бюджетге сом-шай тюшюрлюк ишлеге тыйыншлы эс бёлюннгенин, алай бла бюджетибизге асламыракъ ачха тюше башлагъанын чертгенди.
Къарачай-Черкесияны Башчысы Темрезланы Рашид да: «Арт джыллада Къарачай-Черкесияда социал-экономика кёргюзюмле танг кесекге ёсдюрюлгендиле. Алай болуруна миллет проектле бла федерал программала иги джарагъандыла. Аланы тамалларында бардырылгъан ишле кърал дараджада белгиленнген нюзюрлеге джетерге себеблик этедиле», – деб, РФ-ны Президенти Владимир Путиннге, бизни регионнга федерал аралыкъдан аллай кёлтюргючлюк этилгени ючюн, разылыгъын билдиргенди.
Темрез улу Владимир Путиннге арт 5 джылны ичинде миллет проектлени, федерал эмда регионал программаланы тамалларында Къарачай-Черкесияда ишленнген, джангыртылгъан социал объектлени саны 803-ге джетгенин айтханды.
Владимир Владимировични бизни республикада солургъа келген къонакъла да кёбден кёб болуб баргъанларындан хапарлы этгенди. Президентни кёлтюргючлюгю бла аэропорт ишлеуге аталгъан проектибиз толтурулуб башланнганын, ол ишлеб башласа, Къарачай-Черкесияда солургъа бусагъатдан да кёб адам излеригин чертгенди.
Миллет алчыбызгъа, бизни регионда орунлашхан 34-чю тау моторлу мараб атыучу бригадагъа мындан алда «Гвардиячы» деген сыйлы атны атагъаны ючюн, айырыб разылыгъын билдиргенди.
«Мобилизациягъа тюшген джашланы 70 проценти ол бригаданы къурамындан аскерчиледиле. Алагъа аллай сый берилгенине барыбыз да бек къууаннганбыз», – дегенди Темрезланы Рашид.
Башчы Уллу Хорламны 80-джыллыгъы бла байламлы, Ата джуртну джакъчыларыны джылы деб баямланнган джыл бардырылгъан патриот ишлени юслеринден хапар айтханында, Владимир Владимирович бюгюнлюкде ала эм бек керекли джумушла болгъанларын чертгенди.
«СВО-да онг бола баргъаныбызда, къралыбызны къоркъуусузлугъун бегитиуде да патриот ишле баш орунну аладыла», – дегенди Президент.
Владимир Путин бла тюбешгенини юсюнден Темрез улу социал сетледе кесини аккаунтларында: «Къарачай-Черкесияны кюнден кюннге джашнай, адамланы джашау турмушлары игилене баргъаны Эресейни Президенти кёл бергени бла, аны социал эмда экономика башламчылыкъларын таймаздан толтургъаныбыз бла байламлыды.
Миллет алчыбызгъа бизни регионну социал- экономика ёсюмюне эс бёлгени, кёлтюргючлюк этгени, Ата джуртубузну джакъчыларына, аланы юйдегилерине болушлукъ этдиргени ючюн, хакъ джюрегим бла разыма», – деб джазгъанды.
