Эресейни МВД-ны Зеленчук станседе районла арасы бёлюмюне хыйлачыладан тарыгъа экеулен бирден баргъандыла.
Ала айтханнга кёре, аманлыкъчыла аланы алдаб, 623 800 сомларын алгъандыла. Эки джарсыгъан да Зеленчукде джашайдыла. Аланы бирине 54, ол бирине да 29 джыл болгъанды.

Хапаргъа кёре, аланы экисине да хыйлачыла, телефон бла къонгурау къагъыб: «Интернетде бир финанс платформада ачха тюшюрюрге болушайыкъ», – дегендиле.
Зеленчукчула да алагъа ийнаныб, уллу хайыр алыр муратда хыйлачыла теджеген счётха ачха болгъанларын джибергендиле. Артда уа ётюрюкчюле байламлылыкъ джюрютгенни къойгъандыла.
Бу адамла, хыйлачылагъа алдатханларын ангылаб, полициягъа баргъандыла.
Аманлыкъчыла былай алдаргъа ёч болгъанларын эшите, сакъ болургъа кереклисин биле тургъанлай, экиси да ачхаларындан къуру къалгъандыла.
Аланы тарыгъыулары бла Эресейни МВД-ны Зеленчук станседе районла арасы бёлюмюнде Эресей Федерацияны Терслеу кодексини 159-чу статьясыны 2-чи, 3-чю бёлюмлерине кёре терслеу иш ачылгъанды. Бусагъатда полициячыла ол хыйла ишлени кимле, къалай этгенлерин ачыкъларгъа кюрешедиле.
Къарачай-Черкесияны багъалы адамлары!
Бу джердешлерибизча джарсымаз ючюн, инвестицияланы юслери бла хайыр тюшюрюр муратда кишиге ачха ашыргъынчы инвестицион компанияны неда брокерни сайтын тинтиб, аны юсюнден толу хапарлы болугъуз! Аны реквизитлерине, Эресейни Банкы аллай ишле этерге лицензия бергени бла къалгъанына эс бёлюгюз! Электрон бочхагъа неда кимни болса да картасына ачха ашыр деген хапар чыкъгъанлай а, чыртда сагъайыб къалыгъыз!
Кесамат бегитгинчи, ачхагъызны кишиге да ашырмагъыз!

КъЧР-ни МВД-ны пресс-къуллугъу.