Кёб болмай бютеу Эресейде бардырылгъан «Семейная зарница» деген аскер-патриот оюнну регионал кёзюую бардырылгъанды.

Эришиулеге республиканы шахарлары бла районларындан 12 юйдеги къошулгъанды. Ала иш этиб къуралгъан тыйгъычладан ётгендиле, шкокну чачыб, джыйгъандыла, пилотсуз учхан аппаратланы учургъандыла, Эресейни тарихи бла байламлы билимлерин кёргюзгендиле.
Эсеблеге кёре, эришиулени регионал кёзюуюнде Джёгетей Аягъы райондан Борлакъланы юйюрлери хорлагъанды. Энди Борлакълары Къарачай-Черкесияны сыйын «Семейная зарница» деген аскер-патриот оюнну федерал дараджада заочно халда бардырыллыкъ эришиулеринде джакъларыкъдыла. Аны кёзюуюнде видеовизиткаларын теджерикдиле, Эресейни тарихи эмда кърал белгилери бла байламлы теджелген сынауладан ётерикдиле.
Хар команда тёрт адамдан къуралады – ата бла ана эмда джыллары 12-ден 16-гъа дери болгъан сабийле. Аскер-патриот оюнну заочно халда бардырылгъан эришиулери къыркъар (август) айны 10-на дери барлыкъдыла. Аны ызы бла анга къошулгъанланы финал эришиулеге хазырларыкъдыла.
Борлакълары бютеу Эресей дараджада бардырылгъан аскер-патриот оюнну финалына чыгъыб, Къарачай-Черкесияны атын махтау бла айтдырлыкъларына ышанабыз.
«Семейная зарница» деген проект РФ-ны къоруулау министрини орунбасары, «Защитники Отечества» деген кърал фондну Председатели Анна Цивилеваны башламчылыгъы бла Ата джуртну къоруулаучуну джылында толтурулады. Аны къурагъанла – «Движение Первых», «Юнармия» къозгъалыула, «Защитники Отечества» фонд, «Воин» деген аралыкъ.

(Бизни корр.).