Джёгетей Аягъы районну Джангы Джёгетей элинде Маданият юйню къатын джарашдырыб тебрегендиле. «Эллени айнытыу» деген федерал программаны толтуруу бла байламлыды бу ашхы иш.

Быйыл къыркъар (август) айны аягъына орамны джарашдырыб бошарыкъдыла. Адамла алайда бош заманларында солурча эмда олтурурча болум къураллыкъды. Сёзден, алайда сабий майданчыкъ ишленникди, спорт бла кюреширге излегенлеге тренажёрла салынныкъдыла.
– Бюгюнлюкде былайда ишни асламысы тындырылгъанды, джарашдырыллыкъ джерни тюбюне чыдамлы материалны тёшерге хазырланадыла, къынгырын-мынгырын тюзетиб кюрешедиле. Баш мурат этилген затны деменгили болуруна ажымсызлыкъды. Ол заманда уллу, гитче да кёб заманны хайырланырча боллукъдула, – деб хапар айтхандыла Джёгетей Аягъы районну администрациясында.
Кёб турмай джерге асфальтобетонну эмда 40 миллиметрли резин плитканы тёшеб тебрерикдиле. Сабийле, джыгъылсала да, джукъларын ачытырыкъ тюлдюле. Сабий майданчыкъны къаты бла асфальт джолчукъ да ишленникди.
Эм сейири уа неди десенг, сабийлеге джангы оюнчакъла салынныкъдыла – алкъын аллайла республиканы бир джеринде да джокъдула.