Кавказ тауланы фашистледен сакълай джан берген джигитлеге атаб, Клухор ауушда эсгертме (стелла) бла «Кавказ ауушланы къоруулагъанлагъа» деген белги (знак) ачылгъандыла.

Ол Уллу Хорламны 80-джыллыгъы бла Эресейни МЧС-ни 35-джыллыгъына эмда Тинтиу органланы къуллукъчуларыны кюнюне аталгъанды.
Джыйылыугъа Эресейни МЧС-ни Къарачай-Черкес баш управлениесини тамадасы Александр Голоколенко, КъЧР-де ФСБ-ны Чекчи управлениесини тамадасы Андрей Самороков, Тинтиу комитетни, Тебердиде миллет паркны келечилери, дин къуллукъчула, МЧС-ни эмда Тинтиу комитетни ветеранлары, Баш управлениени къутхарыучулары эмда энчи къурамы къошулгъандыла.
– Бизни къарт аталарыбыз Уллу Хорламны келтиргендиле. Аланы этген джигитликлерин биз ёмюрде да унутурукъ тюлбюз. Кавказ ючюн къаты сермешиуле баргъандыла, ол Ата джуртубузну аскер тарихинде энчи орун алады. Биз, биригиб, джауну ыхтыргъанбыз. Ёсюб келген тёлюле ол затдан хапарлы болургъа керекдиле. Ийнанама, биз бюгюн ачхан эсгертмени къатында бизни ызыбыздан келгенле да ёхтем сюелликлерине, – дегенди, джыйылыуну ача, Александр Голоколенко.
Андан сора барысы да, 2500 метрден аслам мийикликге ёрлеб, эсгертмени эмда джулдузну – джер джюзюн къоруулагъан аскерчилени белгилерин – орнатхандыла.
Эсгертмеге гокка хансла да салыб, аскер сауутдан юч кере да атыб, бир такъыйкъаны шошлукъгъа да бёленнгендиле.