Тынч, дженгил хайыр тюшюрюрге болушайыкъ деб, хыйлачыла джердешлерибизни ачхасыз къойгъандыла.

Бу кюнледе Эресейни МВД-ны районла арасы «Хабез» бёлюмюне Кара-Паго элде джашагъан 24 джыл болгъан тиширыу аманлыкъчыладан тарыгъа баргъанды.
Ол айтхандан, бу танымагъан биреулен анга, телефон бла къонгурау къагъыб, кесин банкны къуллукъчусуча танытыб: «Сен банкны системасында кёрюнмейсе, кёрюнюр ючюн мессенджерде эсебге тюшерге керексе», – дегенди.
Ызы бла анга дагъыда бир башха адам телефон бла сёлешгенди. Ол да: «Кърал джумушланы порталында энчи хапарынгы ким эсе да кесине кёчюре турады. Банкда ачхангы алыб къояргъа боллукъду», – деб къоркъутханды. «Ара банкны къуллукъчусу бла байламлы этейим, банкда ачхангы аны счётуна ашырсанг киши тиймез», – деб да къошханды.
Карапагочу тиширыу да, анга ийнаныб, ол айтханны этгенди. Ол 60 минг сомун берилген счётха ашыргъанды.
Дагъыда хыйлачы: «Ачхангы Эресей бла шохлукъ джюрютмеген къралгъа ашыргъанса, террористлеге болушлукъ этгеннге саналлыкъса. Кёб турмай сени бла къралны къоркъуусузлугъун сакълагъан органларыны къуллукъчусу байламлы боллукъду», – деб джанын алгъанды.
Ол айтханча, бу джарлы тиширыугъа дагъыда биреулен телефон бла сёлешгенди. Ол, 785 000 сом берсе, бу къалабалыкъдан башын алыргъа болушургъа айтханды. Бу тиширыу да, къуру 120 000 сому болгъанын айтыб, аны ашыргъанды. Алай бла, хыйлачыла, алдаб, къоркъутуб, аны 180 000 сомун алгъандыла. Джарсыгъан тиширыуну тарыгъыууну тамалында терслеу иш ачылгъанды.
Черкесскеде джашагъан 26 джыл болгъан дагъыда бир тиширыу кесин алдатханды. Мессенджерлени биринде анга маркетплейсде хайыр тюшюрюр мадар теджелгенди.
Айтылгъаннга кёре, ол тюрлю-тюрлю къауумлагъа къошулуб, анда теджелген затлагъа «лайкла» салыргъа, аланы махтаргъа керек болгъанды. Аманлыкъчыла анга, алай этгени ючюн, ачха тёлерге дегендиле.
Алай этген къыйын болмагъаны ючюн, ол тиширыу алданнганды. Теджелген ссылкала бла кириб, юретгенлерича эсебге тюшгенди. Айтылгъанны эте, 2-3 кюнню ичинде 1 603 сом алгъанды. Ол хайыр тюшюрюрюне ийнаннганында, хыйлачыла анга, кёбюрек ачха тюшюрюр ючюн, ары-бери затла сатыб алгъанча этерге керексе деб, алдагъандыла. Ол да, алагъа ышаныб, 164 472 сомун айтылгъан счётлагъа джибергенди.
Ол халда кеслерин Черкесскеде джашагъан 69 джыл болгъан бир тиширыу, Икон-Халкъда джашагъан 35 джыл болгъан дагъыда бир тиширыу алдатхандыла. Аманлыкъчыла ётюрюк бла аланы экисинден 83 840 сом алгъандыла.
Бу тиширыула быллай хапарланы эшите, сакъ болургъа кереклисин биле тургъанлай джарсыгъандыла.
Къарачай-Черкесияны багъалы адамлары!
Республиканы джорукъ сакълаучу органлары танымагъан, иги билмеген адамларыгъыз бла ачха-бочха джюрютмезге чакъырадыла.
Ышаннгылы болмагъаннга санагъан ишлеригизни юсюнден терк огъуна полициягъа хапар берсегиз иги боллукъду. Джорукъ сакълаучу органланы къуллукъчулары телефон бла не оператив, не тинтиу ишле бардырмагъанларын, алай этер ючюн, адамладан ачха-бочха излемегенлерин хар адам да билирге керекди.
Мен анда-мында ишлейме деб, сёлешген болса, аны атын, атасыны атын, тукъумун, къуллугъун соруб, айтхан организациясына къонгурау къагъыб, керти да анда аллай адам ишлегени бла къалгъанын билирге да боллукъду.

КъЧР-ни МВД-ны пресс-къуллугъу.