Кеси да СВО-да ёлген Сергей Юшковну эсгериуге аталыб, ол окъугъан 3-чю номерли орта билим берген школну джеринде бардырылгъанды. Аны «Динамо» обществону регионал бёлюмю бла Къарачай-Черкес Республиканы Халкъ Джыйылыууну (Парламентини) депутатлары къурагъандыла.

«Джукъну сансыз этмеген адамла сау болсунла, спортну пляж тюрлюсюню площадкасын къурагъанла Сергей Юшковну анасы Маргарита Валерьевнагъа болушлукъгъа да кёб иш этедиле. Ол бу школда физкультурадан дерсле береди. Аны сабийлеге тохтаусуз къайгъыргъаны, аланы саулукъларын бегите, ашхылыкъгъа, патриотлукъгъа юрете, кёб иш этиб кюрешгени, ана джюрекни джылагъанын, къыйналгъанын бир кесек тыяргъа себеб болады», – дегенди турнирни къурагъанланы бири, КъЧР-ни Халкъ Джыйылыууну (Парламентини) къуллукъчусу Инесса Резникова.
Бу турнир 16-дан 68 джылгъа дери волейболистлени кесине тартхан ашхы джер болгъанды. Алайгъа кёб адам джыйылгъанды, юйдегилери бла да кёбле баргъандыла.
Анда ёчле командалагъа берилгенден сора да, фахмулу, тири волейболистле энчи белгиленнгендиле. 68 джыл толгъан Мухамед Абидоков эм сынамлыгъа, 2 джыл болгъан Агата Аксенова эм джаш джан аурутуб къараучугъа саналгъандыла. Хорламгъа учунмакълыгъы ючюн деген номинацияда депутат Инесса Резникова хорлагъанды.
Турнирни къурагъанла бла анга къошулгъанла КъЧР-ни Халкъ Джыйылыууну (Парламентини) депутатлары Каппушланы Русланнга, Къочхарланы Алийге, Резникова Инессагъа, спортну пляж тюрлюлерине джораланнган бу площадканы къурагъанлары ючюн, разылыкъларын билдириб, бюсюреу этгендиле.
Ол площадканы къурар ючюн, алайгъа 90 тонна къум элтилгенди. Аны волейболистле, сюдюле, юретиучюле кеслери чачыб, тюзетиб джарашдыргъандыла. Энди бу площадкада шахар волейболистлени сабий секциялагъа джюрюгенлери эмда башхала юренирикдиле. Этилген иш республиканы джамагъатыны саулугъун бегитирге себеб боллукъду.

Узеирланы Хусей.