Черкесск шахарда Къан къуюучу станцияда биринчи болушлукъ табдырыудан хар байрым кюн сайын хакъсыз дерсле бардырыладыла. Анга ким сюйсе, ол къошулургъа боллукъду.

Станцияны къуллукъчулары дерслеге къошулгъанлагъа адамгъа биринчи болушлукъ этиу бла байламлы билимлерин, сынамларын кёргюзедиле. Къан къуюучу станцияны баш врачы Башкаланы Мурат айтханнга кёре, бу ашхы иш КъЧР-ни Саулукъ сакълау министерствосуну буйругъу бла этиледи.
«Байрым кюн сайын станцияда биринчи болушлукъ этиуню хакъындан дерсле бардырыладыла. Бу иш адамланы джашауларын сакъларгъа мадар берлигине, республикада джашагъанлагъа хайыр келтирлигине ишексизме. Адамланы къоркъуусузлукъларына, саулукъларына да терен эс бёлгени ючюн, КъЧР-ни Саулукъ сакълау министерствосуна разылыгъымы билдиреме», – дегенди Башкаланы Мурат.
Айтыргъа, адам эс ташласа, джюреги тохтаса, джаралы болса не этерге кереклисин, къанны къалай тыяргъа боллугъун юретедиле дерследе. Дерслеге къошулгъанла алгъан билимлерин манекенледе сынаб кёрюр мадарлары да барды.
Дерслеге къошулгъанланы арасында Эресейни Сюдю приставларыны федерал къуллугъуну КъЧР-де бёлюмюню къуллукъчулары, колледжлени студентлери, «Движение Первых» къозгъалыуну келечилери дагъыда башхала бардыла.
«Бизге тюрлю-тюрлю организацияланы къуллукъчулары, тюз адамла да келедиле. Бизни эшиклерибиз кимге да ачыкъдыла. Дерслеге къошулургъа излегенле станцияны регистратурасында неда сайтында толу хапар билирге боллукъдула», – деб къошханды Башкаланы Мурат.

(БИЗНИ КОРР.).