Кёб болмай Москвада «Эресей» деген миллет аралыкъда «Всё для Победы!» деген чакъырыу бла Халкъ фронтну 3-джыллыгъына аталгъан уллу форум бардырылгъанды.

Анга къралыбыз- ны джер-джеринден 3 джылны узагъына аскер къаугъада джигитлерибизге кеси разылыкълары бла болушлукъ этиб тургъан къайгъырыулу адамла къошулгъандыла. Анда Къарачай-Черкесияны келечилери да болгъандыла.
РФ-ны Президенти Владимир Путин, форумчула бла тюбешиб, тюзлюк орун алыр ючюн, Эресейни бютеу джамагъаты биригиб, Халкъ фронт болуб къалгъанын, кими ачха бла, кими башха зат бла болушхан адамла аскерчилерибизге кёл бергенлерин, алай бла, ала алгъа таукел баргъанларын чертгенди.
Миллет алчыбыз, аскер къаугъа башланнганлы бери Халкъ фронт Ата джуртубузну къоруулай тургъан джигитлеге болушлукъгъа 54 миллиард сом джыйгъанын айтыб, бу ишге юлюш къошхан адамлагъа уллу бюсюреу этгенди.
Президент бла тюбешиуде бизни региондан Халкъ фронтну КъЧР-де бёлюмюню толтуруучу комитетини тамадасы Каппушланы Людмила, «Къобан» колхозну тамадасы, Эресейни Тиширыуларыны бирлешлигини Къарачай-Черкесияда регионал бёлюмюню тамадасы Борлакъланы Марина, «МонЭльбрус» театрны директору Къоркъмазланы Руслан, Федерал налог къуллукъну КъЧР-де управлениесини бёлюмюню тамадасы Хамукова Жанна, Аграр-технология колледжни директоруну окъуу-методика джаны бла орунбасары Найманова Белла, КъЧР-ни промышленность бла энергетиканы хакъындан министрини орунбасары, сууаблыкъ ишле бла кюрешген «Зов КЧР» деген къауумгъа кирген Тлисов Арсен болгъандыла. Ала этген ишлерине Президент аллай уллу магъана бергенине къууаныб, ёхтемлениб къайтхандыла. Къайгъырыулу адамларыбыз къралыбызны рахатлыгъын сакълагъанлагъа мындан ары андан да тири болушургъа мурат этедиле.
«Форумгъа къошулгъан къауумну къурамына Халкъ фронтну бюгюнлюкде бек керекли ишин бардырыргъа тири къошулгъан джердешлерибиз кирген эдиле. Башха джумушла чыгъыб, чакъырылгъанла бары да баралмадыла. Алай болса да, биз алагъа Миллет алчыбызны саламын айтыб келгенбиз.
Хорламны джууукълашдырыр ючюн, тюрлю-тюрлю миллетлени, динлени келечилери биригиб ишлегенли 3 джыл болады. Аскерчилени излемлеринден хапарлы болуб, джамагъатны болушлугъу бла алагъа кереклини дженгил огъуна джыйышдырабыз. Сау болсунла, джердешлерибиз, бютюн да бек табышлылыкъ бла кюрешгенле, иги болушлукъ этедиле. Аланы хар бири да рахатлыкъ сакъланмаса, джашауу, иши да къолай болмазын иги ангылайды.
Бизни ишибизни толу ангыламай: «Кърал кеси хар не бла нек баджармайды?» – деб соргъанла да кёбдюле. Ала, кърал аскерчилени джукъ керекли этмегенин, алай а, урушла бардырылгъан джерледе хар не аяусуз болгъанын, окъ-тоб атылыб, бир такъыйкъагъа аскерчилени хар нелери да кюл-кёмюр болуб къалгъанын билселе излейбиз. Биз фронтха окъ-тоб алмайбыз, джол джарашмагъан джерледе джюрюген машинала, учуб келген дронну билдирген керекле, техниканы джашырыргъа джарарыкъ аула, аны кибик аскерчилерибизни джанларын сакъларгъа джарар деген затла ашырабыз. Халкъ фронтну КъЧР-де бёлюмю бизни региондан джашла болгъан бютеу аскер бёлеклеге да болушургъа кюрешеди. Бу ишибизни мындан ары да бардырлыкъбыз, бизге къошулгъанлагъа разы боллукъбуз. Ма бу кюнледе да бек уллу джюк ашырыргъа керекбиз», – дейди Каппушланы Людмила.
Людмила айтхандан, Халкъ фронт бла бирге Хорламны джууукълашдырыргъа, аскерчилерибизге кёл берирге излегенле теджелген код бла сом-шай ашырыргъа неда 8(928) 027-41-22 телефон номер бла керекли затланы соруб, аланы алыргъа болушургъа боллукъдула.
«Къобан» колхозну тамадасы, Эресейни Тиширыуларыны бирлешлигини Къарачай-Черкесияда регионал бёлюмюню тамадасы Борлакъланы Марина аскер къаугъа башланнганлы алай этиб турады. Сыйлы къонакъ болуб, форумгъа да аны ючюн чакъырылгъанды.
«Президентибизни айтханына бек ёхтемлениб тынгыладым. Анда ветеранланы, бизнесменлени, волонтёрланы, конструкторланы, артистлени дагъыда башха тюрлю-тюрлю къуллукълада ишлеген, миллетлери-динлери башха болгъан мингле бла адамланы Хорлам ючюн бирикгенлерин кёрюб къууандым. Ата джурт къазауатны кёзюуюндеча, бюгюнлюкде да джамагъат биригиб, тюзлюк ючюн уруш этгенлеге билек болуб турады.
Сауут-саба алыб, урушлагъа къошулур хыйсабыбыз болмаса да, къралыбыз Хорламлы болурун, рахатлыкъ сакъланырын барыбыз да излейбиз. Къолубуздан келгенича аскерчилеге болушургъа кюрешебиз. Мен, кесимча джол тюзете турмай, къайры, къалай не элтирге кереклисин билгенле бла бирге аскерчилерибизге джараулу затланы джыйышдырыргъа болушама. Ол халда Халкъ фронт бла келишиулю ишлегениме 3 джыл болуб келеди», – дейди Марина.
Борлакъланы Марина аскерчилеге джюк ашырыргъа болушлукъ этиб тургъанын, аны ючюн Халкъ фронтну Хурмет белгиси бла саугъаланнганын чертеди Каппушланы Людмила да.
Ол айтхандан, Халкъ фронтну Хурмет белгиси Президенти излеми бла къуралгъанды. Аны бла бу къыйын заманда Хорламны джууукълашдырыргъа уллу юлюш къошхан къайгъырыулу адамла саугъаланадыла.
Аллай Хурмет белги бла Каппушланы Людмила кеси да саугъаланнганды.
Форумну тамалында кесича къайгъырыулу адамла бла бирге Борлакъланы Марина Москвада РФ-ны Къоруулау министерствосуну Аскер социал аралыгъына баргъанды. Анда ишни таб джарашханын черте, ол джамагъатха джарарыкъ хапарны айтады.
Марина чертгенден, ол аралыкъгъа 8-800-600-60-09 телефон номер бла аскерчиле кеслери да, аланы юйдегилери да джарсыуларын билдирирге боллукъдула. Аралыкъны къуллукъчулары алагъа не джаны бла да болушургъа кюреширикдиле.
Алай бла, аскерчилерибиз Ата джуртубузну политикасын фронтда джакълагъан заманда, тылда халкъ да биригиб, алагъа кёлтюргючлюк этеди. Аны себебинден, Хорлам бизники боллугъуна ышанмакълыкъ уллуду.

БАЙРАМКЪУЛЛАНЫ Зульфия.