Бу кюнледе МВД-ны КъЧР-де Тинтиу управлениесини тамадасыны орунбасары юстицияны полковниги Алчакъланы Ханапийни джашы Рамазан тенглери бла, къартланы эсгериуге, аланы джакълаугъа атаб, сууаблыкъ иш этгенди. Ол иш республикан дараджада бардырыла, тёгерекге мамырлыкъны, рахатлыкъны кючюн джайгъанды.

Пристань элден Мара элге дери тау маршрут къураб, талай атлы джыйылыб, аны бла баргъандыла. Джол бизни таурухлу джуртубузну сейир джерлери бла салыннганды. Уллу, гитче да, тюрлю-тюрлю джылгъы атлары бла, асламысына къарачай тукъумлу джоргъа аджирле бла, ол маршрутну тыйгъычсыз, рахат ётгендиле. Джолда ёзенлеге тюше, ауушлагъа чыгъа, дуппурлагъа мине, чунгурла бла бара, чегетлеге кире, уллу, гитче сууланы ёте, 150-ден аслам атлы бир-бирин джокълай, рахат халда баргъандыла. Джашла спорт бла байламлы болуб, атлары бла, аладан тюшюб джаяулай да таулагъа чабыб, кючлерин сынай ойнагъандыла. Джашла атларын сынай, чыныкъдыра, Мара элге джетиб, алайда тохтагъандыла. Марачыла ата-бабадан келген ашхы адетлерибизни тамалында, аланы алларына гоппан айран бла чыгъыб, хошкелди бла тюбеб, къонакъланы сыйлагъандыла, къонакъбайлыкъ этгендиле.
Бардырылгъан сууаблыкъ ишни тамалында республикада Къартланы юйюне 240 минг сом болушлукъ этилгенди.
Ашхы къуралгъан бу сууаблыкъ ишге атчыла республикабызны районларындан, андан тышындан да къошулгъандыла. Къарачай-Черкесияда этилген быллай ашхы проектле адамланы бирикдиредиле, къууандырадыла, арада шохлукъну кючюн бегите, рахатлыкъны, мамырлыкъны джаядыла. Ол республикабызны бу джаны бла, ат спортдан, ашхы джетишимлерини дараджасын, сууаблыкъ иш этиуню юлгюсюн кёргюзеди.

Лепшокъланы Хусеин.