Эл мюлк ишлени эм магъаналы кёзюую мюрзеу джыйгъан заманды. Ол ишни отдан къоркъуусузлукъну мадарларын сакълаб этиу баш джумушланы бириди.

Белгилисича, мюрзеуге отдан кёб заран джетеди. Тинтиу кёргюзгенден, от тюшюуню чурумлары кёб тюрлю затдан боладыла. Техниканы ток чыбыкълары бир-бирлерине тийиб, джилтин чыкъса, гидравлика шланнгала юзюлюб, къызыб тургъан моторну юсюне джау тамса, от тюшерикди. Бир-бир комбайнла джау джагъылгъан, отлукъну берген, гидравлика системалары джарашмагъанлай сабаннга чыгъыб къаладыла. Аланы юслерине джанаргъа боллукъ букъу джабышады. От тюшгени болса, ол бютеу комбайннга терк джайыллыкъды. Аны юсюне комбайнланы асламысы сабанлагъа от джукълатыучу мадарлары болмагъанлай чыгъадыла. Андан сора, мюрзеуню кебдирген, тазалагъан, асырагъан сагъатда да отдан къоркъуусузлукъну сакъларгъа тыйыншлыды. Мюрзеу кебдирилген джерни джылытхан системада температура уллу не гитче болмай, бирча турса игиди. Бу джанына джууаблы адамла хар затны кёз туурада тутханлай турургъа керекдиле. Ол иш хар адамны борчуду. Белгиленнген джорукъ бузулмаса, мюрзеу тыйыншлысыча сакъланныкъды.
Мюрзеу джыйгъан сагъатда къоркъуусузлукъ сакъланыр джанындан кюрешедиле ол ишге джууаблы къуллукъчула.
Битим джыйгъан сагъатда, ол ишни этерни аллы бла объектни тамадасы машиналаны, агрегатланы хазырларгъа, комбайнчыла бла, кебдирген комплекслени машинистлери бла, трактористле бла юретиу ишле бардыргъан адам салыргъа тыйыншлыды.
Мюрзеуню джыяргъа баргъан ишчиле бла отдан сакъланыуну хакъындан юретиу ишле бардырыргъа керекди.
Техниканы мюрзеу джыйылгъан джерден, токдан, бичен антауладан, от тюшерине чурум боллукъ башха затдан азы бла 100 метр узакълыкъда тутаргъа керекди. Мюрзеу джыйгъан сагъатда, кеслери джюрюген шассилени, косилкаланы, тракторланы, машиналаны, комбайнланы тютюн чыкъгъан трубаларында джилтинни джукълатхан затлары болургъа керекди. Транспортну джюрютген адам кюнюне 2-3 кере моторну, коллекторну, тютюн чыкъгъан трубаны юслерин букъудан, хансдан тазалаб кирсиз тутаргъа керекди.
Тракторланы, электрокарланы, кеслери джюрюген техникаланы аккумуляторлары, клеммалары, генераторлары тазаланыб, алагъа токну ётдюрюрге боллукъ затла тюшмезча мадарла къуралыргъа керекдиле.
Моторланы радиаторларында джау джугъу букъуну кюйдюрюрге болмайды. Мюрзеу джыйгъан техниканы дженгил-дженгил хар несине къараб, аны таза тутаргъа тыйыншлыды.
Мюрзеу джыйгъан машиналаны, агрегатланы ремонт ишлерин мюрзеу джыйылгъан джерден 30 метр узакълыкъда этерге керекди.
Мюрзеу болгъан джерде от тюшмезча кёз-къулакъ болуб тургъан къарауулла болургъа керекдиле. Аланы техникалары суу бла, башха от джукълатхан затла бла баджарылыргъа тыйыншлыды.
Сабан темир, асфальт джоллагъа джууукъда орналгъан эсе, битим джетерге, аны тёгерегинде джерни 4 метр узакълыкъда сюрюб, къаралтыргъа керекди.
Мюрзеу сабанда тютюн ичерге, ачыкъ от этерге, къургъакъ хансны кюйдюрюрге эркинлик джокъду. Тютюнню техникадан 4 метр узакълыкъда, иш этиб белгиленнген джерде ичерге болады.
Тракторлагъа, комбайнлагъа, башха машиналагъа отлукъ къуйгъан техника ол ишни моторланы джукълатыб этерге борчлуду. Кече, аллай техника болгъан джер джарыкъ болуб турса игиди.
Мюрзеу джыя тургъанлай от тюшюб къалса механизатор таууш этиб неда чыракъ джандырыб-джукълатыб, белги береди. Къолунда болгъан зат бла отну джукълатыргъа кюрешиб, мюрзеу джыйгъан агрегатны алайдан къоркъуусуз джерге чыгъарады. Сабаннга, мюрзеуге от джайылмазча мадарла къурайды. От тюшген джерни тёгерегин неда бир джанын къазыб, ол джайылмазча этеди.

Гришаева Е.,
Эресейни МЧС-ни Зеленчук районда ОНД бла ПР-сыны бёлюмюню тамадасы ич къуллукъну тамада лейтенанты.