«Багъалы редакция! Бизде, Къызыл Покун элде, билимли, фахмулу, ариу халиси болгъан фельдшер ишлейди. Ол хоншу элде, Красный Востокда, джашайды, аты Иринады. Усталыгъына толу берилибди.
Биз, Къызыл Покун элде джашагъанла, аны юсюнден газетде джазарыгъызны излейбиз» деб, элчилени атындан Орусланы Абдурахман «Абазашта» газетге билдиргенди.
Мен, газетни редактору Фардаус Кулованы аманатын толтура, Къызыл Покун элге бардым. Элни фельдшер-акушер пунктуну ариу мекямын кёргенимде бек къууандым. Ол эртде заманда администрацияны мекямында эди, кеси да ток бла джылыннганы ючюн, бёлмелери сууукъ эдиле.
Мен фельдшер пунктха 9 сагъатха баргъанымда, аны эшиклери ачылыб эдиле. «На вызове» деб, къагъыт тагъылыб тура эди. Мен да алай тургъанлай, орта билим берген школну алгъыннгы директору Саркъытланы Умар келиб къалады. Мен анга нек келгеними айтханымда, ол сагъыш да этмегенлей: «Акъыллы тиширыуду, кесини ишин иги биледи, хар адамгъа терен къайгъыргъан, мийик культуралы адамды. Биз анга бек разыбыз», – деди. Мен аны алай айтханына къууандым. Бир кесекден огъары орамдан, хызени бла фельдшер тюшюб келди. Ышара-ышара мени къатыма джууукълашды. Ол кечмеклик тилеб, былайда бир ауруб тургъан тиширыу барды, эрлай мен анга бир къараб келейим деб, кетди. 20 такъыйкъадан ол аны бла бирге келиб, фельдшер пунктха кирди. Меннге «Прививочная», «Процедурная», «Кладовая медикаментов», «Нестерильная зона», «Стерильная зона» деб, кабинетлерин кёргюздю. Хар не да таза, ариу джарашыб эди. Хар кабинетде компьютер, керекли медицина оборудование бар эди. Биз аны кабинетинде олтуруб ушакъ этдик.
Фельдшер Хубийланы Ирина (къыз тукъуму Кичева) 1960-чы джыл арттотур (апрель) айны 20-да Гитче Къарачай районну Красный Восток элинде туугъанды. Ол сабий заманындан медицина къуллукъчу болургъа излеб тургъанды. Красный Восток элде орта билим берген школну бошаб, къагъытларын Архангельскеде медицина институтха ётдюреди. Экзаменлени тыйыншлысыча береди, ай медет, баллары джетмей, киралмай къалады. Ол заманда аны медицина училищени фельдшер факультетине экзаменсиз аладыла. Фахмулу, билим алыргъа тырмашхан студент къыз алайда бардырылгъан не тюрлю ишге да къошулгъанлай турады. Джууаблылыгъын терен сезиб, тутхан ишин тыйыншлы дараджада толтуруб, устазладан, биргесине окъугъанладан бюсюреу табады. Ол Архангельскени больницаларында практиканы ётюб, билимин, сынамын ёсдюреди.
Училищени бошагъандан сора, кърал аны Архангельскеде космодромгъа иерге излейди. Анга отпуск бередиле да, ол юйюне къайтады. Фахмулу, тири къыз урунуу джолун Ессентуки шахарда санэпидемстанцияда башлайды. Алайда эки джыл ишлегенден сора, Ючкекенни санэпидемстанциясына кёчюредиле. Аны алайдан медсестра этиб Красный Восток элни участок больницасына иедиле. Ол анда тамада медсестра болуб ишлейди. Районну медсестраларыны арасында эм игилени бири болуб, Хурмет грамотала, багъалы саугъала бла саугъаланады.
– 2004-чю джыл Къызыл Покун элни тамадасы Батдыланы Мурат Красный Востокну мен ишлеген участок больницасына келиб: «Баш участок врач Тамбийланы Анзор, тишлеге къарагъан врач Батдыланы Абучук, сени бла бирге ишлегенле сени алыб кел, дегендиле. Къызыл Покун элде фельдшер джокъду. Адамла ауруйдула, джунчуйдула», – деди. Мен адамланы джазыкъсыныб, барыб къалгъан эдим. Андан бери 21 джылны былайда ишлейме. Адамла мени ариу биледиле, мени ала бары да джууукъ адамларыча кёредиле, – деб хапар айтады Ирина.
Кюн сайын ауругъанлагъа, гитче сабийлеге, башха инджиленлеге, джунчугъанлагъа, юйлерине барыб къараб тургъан, къыйын болса да, бек сыйлы ишди. Фельдшер Ирина Фуатовна джылыда, сууукъда да, асламысына джаяулай, ауругъанланы юйлерине барыб къарагъанлай турады. Къызыл Покунда 1048 адам джашайды, ичлеринде 141 сабий, 80 сакъат бардыла, Хубийланы Ирина бла Каппушланы Фарида эркин кабинетледе ишлеселе да, сууукъдан джунчугъанлай тургъандыла. 2020-чы джыл «Саулукъ сакълау» деген миллет проектни тамалында фельдшер пунктха джангы мекям ишлеб бергендиле. Кабинетле керек зат бла толу баджарылыбдыла. Къыйын, ауур ауругъан болса, районнга билдиредиле да, андан «Терк болушлукъну» машинасын бередиле.
Къыш, джай да фельдшер Хубийланы Ирина, аны сакълаб тургъан, багъалатхан, сыйын кёрген Къызыл Покун элге келгенлей турады. Былайыны адамлары абаза халкъны джигер, огъурлу къызын бек сюедиле. Ол саулукъларын бакъгъан адамла бек къууанадыла, сабийле, къартла, орта джылгъыла аны терк ангылайдыла, туугъан адамларыча кёредиле.
Ирина баш иеси Хасан бла бирге 4 сабий ёсдюргендиле. Фатима бла Галина юйдегиле къураб, гитче сабийлерине къарайдыла. Азамат Эресей гвардияда ишлейди. Ол СВО-гъа барыб, джигитлик танытыб, Жуковну медалы бла саугъаланнганды. Рустам анасыны джолу бла барыб, Ростовдагъы медицина институтну «Инженер медицинского оборудования» деген факультетин тауусуб, анда ишлейди. Медицина-биология илмуланы кандидатыды. Аталары Хасан ауушханды, джандетли болсун.
Мындан алда Иринаны юбилейинде, анга «Урунууну ветераны» деген сыйлы ат аталгъанды, медаль бергендиле. Республиканы Саулукъ сакълау министерствосундан Хурмет грамота да алгъанды.
Мен Къызыл Покун элни джамагъаты бла бирге анга мындан ары да кючлю саулукъ, узакъ ёмюр, насыб теджейме.
Бидов Рубин,
КъЧР-ни махтаулу журналисти.
