Аскер къаугъагъа къошулгъан джашлагъа болушур иннет бла Къарачай-Черкесиядан кёзюулю гуманитар джюк ашырылгъанды. Бизни джердешлерибиз джуртларыны аллында адамлыкъ борчларын сый бла толтурадыла, хорламны дженгилирек келтирир ючюн, кючлерин-къарыуларын аямай кюрешедиле.

Бу джол ашырылгъан джюкню Къарачай шахар округ джыйышдыргъанды. Джиберилген джюкню ичинде аскерчилеге амалсыз керекли затла бардыла: дарман-дары, юс эмда ич кийим, джукълаучу машокла, газ печле, генераторла, газ баллонла дагъыда башхала. Джиберилген керекли затланы арасында сабийле джазгъан письмоланы айырыб чертерге тыйыншлыды. Алада бир тюрлю бир сейир джылыу барды. Бир къауум письмоланы ичлеринде суратла да бардыла – аланы фахмулу сабийле аскерчилени кёллерин кёлтюрюрге деб салгъандыла.
– Биз джуртубузну сакълагъан джердешлерибиз бла байламлылыкъны юзмейбиз. Аланы излеген затларына терк сагъайыб, табдырыр къайгъыгъа кириб къалабыз. Мындан ары да ол адет бузуллукъ тюлдю. Бизни джыйыучу бёлюмюбюз Къарачай шахарда Къулийланы Къайсын атлы маданият аралыкъда орналгъанды. Аны эшиклери кюн сайын ачыкъдыла. Аскерчи джашлагъа болушлукъ этерге излегенле алайын табарыкъдыла, – дегенди Къарачай шахар округну мэри Орусланы Марат.