Къарачай-Черкесия, Эресей Федерацияда 29 регионуну бири болуб, «Агромотиватор» деген федерал программагъа къошулгъанды.

Бу программа аскер къаугъаны ветеранларына эмда алкъын анда болгъанлагъа эл мюлкде энчи иш башларгъа джол ачарыкъды. Элия (июль) айны аллында РФ-ны Правительствосу аны юсюнден бегим алгъанды.
КъЧР-ни Башчысы Темрезланы Рашид айтханнга кёре, «Агромотиватор» – ол аскер къаугъаны ветеранларына эмда анга къошулуб, запасха кетгенлеге кърал этген финанс болушлукъду. Аны ызына, къралгъа, къайтарыргъа керек боллукъ тюлдю. Ол ачханы кючю бла эл мюлк санагъатда табышлылыкъ ишни башларгъа мадар чыгъарыкъды.
Грант конкурс тамалда берилликди. Тилек къагъыт джазардан алгъа бу затланы билирге керекди: налог борчу болмазгъа керекди; юч джылгъа ортакъгъа алгъан джери неда кесини джер юлюшю; элде табышлылыкъ иш бла кюреширге эркинлик берген регистрациясы; бизнес-планы; ачханы неге джоярыгъынгы отчёту болургъа тыйыншлыдыла.
– «Агромотиватор» программа аскер къаугъаны ветеранларына эмда анда болгъанлагъа эл мюлкде кеслерини хыйсабларын сынаргъа мадар берген бла бирге, Къарачай-Черкесияны экономикасын айнытыргъа да амал береди. Бизни джигитлерибиз бу программаны тамалында туугъан джерлеринде иги аякъ тирериклерине ышанама, – дегенди Темрез улу.