Бу кюнледе Къарачай-Черкесияда «Молодой профсоюзный лидер России» деген бютеу къралда бардырылгъан конкурсну регионал кёзюую тамамланнганды.
Конкурсну регионал дараджасын республиканы профсоюзларыны бирлешлиги къураб, хычаман (май) айны 27-ден никкол (июнь) айны 26-на дери эки этапын бардыргъанды.
Конкурсну биринчи кёзюуюнде республиканы организацияларыны санагъат профсоюзларыны къурамына кирген 36 джаш адам энчи анкеталарын, профсоюз бирлешликден рекомендацияларын, профсоюзланы ишине къаллай юлюш къошханлары бла байламлы отчётларын теджегендиле.
Финал эришиулеге иги отчётла хазырлагъанла, эм уллу багъала алгъанла ётгендиле. Никкол айны 26-да джаш адамла «КъЧР-ни джаш профсоюз башчысы» деген атха ие болур ючюн эришгендиле.
Финалгъа къошулгъан джаш адамланы хар бири кесини эмда профсоюз ишлерини юсюнден хапар айтханды, «Вступай в профсоюз», «Правовая ситуация» деген темалагъа видеороликле кёргюзгенди, социал-урунуу джарсыула бла байламлы оюмларын билдиргенди. Ала барысы да эришиулени кёзюуюнде берилген ишлени тыйыншлысыча толтуруб, усталыкъларын, тириликлерин танытхандыла, профсоюзла магъаналы иш баджаргъанларын кёргюзгендиле.
КъЧР-ни Профсоюзларыны бирлешлигини председатели Айбазланы Раиса башчылыкъ этген къурау комитет «Вступай в профсоюз» деген видеороликлеге сейир болуб къарагъанды. Алада джаш адамла профсоюз ишни магъаналылыгъын кёргюзген бла къалмай, башчылыкъ эте билген фахмуларын танытхандыла.
Конкурсну эсеблерине кёре, «НК Роснефть» – Карачаево-Черкесскнефтепродукт» АО-ну ал башланнган профсоюз организациясыны джаш тёлю советини председатели Джатдоланы Зухра хорламгъа тыйыншлы болгъады.
Экинчи орунну Черкесск шахарда 10-чу номерли «Орлёнок» сабий садны ал башланнган профсоюз бирлешлигини джаш тёлю советини председатели, психолог Дарья Быковская, ючюнчю орунну Хабез элде Р.Р. Арашуковну атын джюрютген школну ал башланнган профсоюз бирлешлигини джаш тёлю советини председатели, ингилиз тилден устаз Дина Бастанжиева алгъандыла.
Алчы орунланы алгъанлагъа дипломла бла ачха саугъала берилгендиле.
Биринчи оруннга чыкъгъан Джатдоланы Зухра «Молодой профсоюзный лидер России» деген конкурсну округ дараджада бардырыллыкъ эришиулерине къошуллукъду. Ол къыркъаууз (сентябрь) айда Пятигорскеде «Машук» деген джаш тёлю аралыкъда ётерикди.
Айбазланы Раиса чертгенден, «Молодой профсоюзный лидер России» деген конкурс профсоюз къозгъалыугъа джаш адамланы къошуу бла байламлы къуралгъан «Стратегический резерв» деген бютеу Эресей программаны тамалында барыдырылады.
«Бу ишни Эресейни Бойсунмагъан профсоюзлары бла Къарачай-Черкесияны профсоюзларыны бирлешлигине магъанасы уллуду. Биз профсоюз иш бла кюреширге кёлленнген джаш адамланы ачыкъларгъа муратлыбыз», – дегенди Айбазланы Раиса.
САЛПАГЪАРЛАНЫ Умар.
