2025-чи джыл республикан аралыкъда 11 кёб фатарлы юйню арбазы джарашдырыллыкъды – джоюм республикан эмда джергили бюджетледен этилликди.

Ремонт ишлени къалай баргъанына Черкесскени мэри Алексей Баскаев, КъЧР-ни къурулуш эмда фатар-коммунал мюлк министрини орунбасары Екатерина Приц эмда Черкесск шахар Думаны депутаты Темрезланы Марат къарагъандыла.
Айтыргъа, ала арбазларында ремонт ишле бардырылгъан Ленин атлы проспектде 58-чи эмда 58-чи «А» номерли юйлеге баргъандыла. Былайда къурулушчула иги кесек иш этгендиле: бордюрланы салгъандыла, джаяу джолчукълагъа плитканы тёшегендиле, спорт майданчыкъ боллукъ джерге асфальт къуйгъандыла, эски джайыллыкъ джерни джарашдыргъандыла.
Алайда джашагъанла баджарылгъан ишге даулары болмагъанын айтхандыла, арбаз таб джарашдырыла тургъанын чертгендиле, ёзге эркинликсиз орналгъан гаражланы кетерилирлерин излегенлерин бирлдиргендиле. Мэр ол ишни тюзетирге бегим алыннганын айтханды.
Андан сора Парковая 5-чи «А», 7-чи эмда 9-чу юйлени арбазларына кёзюу джетгенди. Мэр сабийле ойнагъан майданчыкъда бютеу элементлени бир-бирине не къадар джууукъ салыргъа кереклисин билдиргенди. Алайда джашагъан адамла сабий конструкцияланы, игиле, джараулула болгъанлары себебли, къоратмазгъа келишгендиле. Аланы сынгар бояргъа керекди.
Бютеулей да Черкесскеде 200-ге джууукъ арбаз джарашдырылгъанды. Алайда джашагъанланы саны 35 мингден атлайды.