Бу кюнледе Къарачай муниципал районну Тёбен Теберди элинде джашагъан Французланы Мариямгъа 100 джыл, Огъары Мара элинде джашагъан Джанкёзланы Зуриятха да 95 джыл толгъанды.

Къарачай муниципал районну администрациясыны къуллукъчулары аммаланы джарыкъ юбилейлери бла алгъышларгъа баргъандыла.
Ала Уллу Ата джурт къазауатны кёзюуюнде джигер урунуб, аскерчилеге кереклини хазырлаб тургъан аммалагъа Эресей Федерацияны Президенти Владимир Путинни алгъышлауларын элтиб, сыйлы борчларын толтургъандыла.
Къарачай муниципал районну администрациясы Французланы Мариям бла Джанкёзланы Зуриятха энчи саугъала да этгенди.
Байрам кюнлеринде хурметли тиширыулагъа къонакъ болгъан къуллукъчула кёб джылы сёз айтхандыла, туугъанларыны, туудукъларыны араларында узакъ ёмюрню къууанч бла джашагъыз деб, алгъыш этгендиле.
Биз да алагъа къошула, бу эки аммагъа кючлю саулукъ, джюрек рахатлыкъ, узакъ ёмюр теджейбиз. Ата джурт къазауатны кёзюуюнде, Уллу Хорламны джууукълашдырыр ючюн, аскерчилеге билек болгъан тиширыулагъа джюрек разылыгъыбызны билдиребиз.