Озгъан ыйыкъда Правительствону Юйюню Уллу залында Къарачай-Черкесияны Халкъ Джыйылыуу (Парламенти) къууанч джыйылыу бардырды.
Ол джыйылыугъа тюрлю-тюрлю санагъатлада къралыбызгъа, джамагъатыбызгъа хакъ къуллукъ этиб, уллу джетишимлеге джетиб, атларын махтау бла айтдыргъан джердешлерибиз чакъырылгъан эдиле.
Къарачай-Черкес Республиканы Халкъ Джыйылыууну (Парламентини) Председатели Александр Иванов, джыйылгъанлагъа хошкелди айта, ол къууанч Эресейни кюнюне эмда саулукъ сакълау бла социал санагъатда ишлегенлени байрамларына аталыб къуралгъанын чертди.
«Бюгюн бу залда республикабызны махтаулу адамлары джыйылгъансыз. Сиз кюн сайын кесигизни иш орунларыгъызда Ата джуртубузгъа ёсюм алдырлыкъ ишлени этесиз. Сизни озгъан байрамла бла алгъышлай, кърал саугъаларыгъызны бере, мен сыйлы борчну толтурама. Къарачай-Черкесияны, Эресейни айнытыугъа тири къошулгъаныгъыз ючюн разылыгъымы билдиреме», – деди спикер.
Александр Иванов саулукъ сакълауда, билим бериуде, кърал къуллукълада, аны кибик башха джерледе, махтаулу ишлеб, регионубузну, къралыбызны ёсюмюне уллу юлюш къошхан 30 джердешибизни Эресей Федерацияны Федерал Джыйылыууну Федерация Совети бла Къарачай-Черкес Республиканы Халкъ Джыйылыууну (Парламентини) Хурмет къагъытлары бла саугъалады.
Саугъаланнганланы араларында устазла, врачла, артистле, водителле дагъыда башхала бар эдиле.
Алайда республиканы перинатал аралыгъыны бёлюмюню тамадасы Наурузланы Земфира РФ-ны Федерал Джыйылыууну Федерация Советини Хурмет къагъыты бла, Къарачай-Черкесияны Халкъ Джыйылыууну (Парламентини) Комитетлени ишлерине къарагъан управлениесини референтлери Байчораланы Сапият бла Батчаланы Лейла да РФ-ны Федерал Джыйылыууну Федерация Советини Председателини Разылыкъ къагъытлары бла саугъаландыла.
Александр Иванов, джюрек излемлери бла сайлагъан усталыкъларында кёб джылны бюсюреулю ишлеб тургъанларын чертиб, Устазланы усталыкъларын таймаздан ёсдюрюуню хакъындан аралыкъны устасы Айбазланы Ларисагъа, Джёгетей Аягъы шахарны А. Тебу улуну атын джюрютген 1-чи номерли лицейини орус тил бла адабиятдан устазы Айбазланы Светланагъа, Важное элни орта школуну къарачай тил бла адабиятдан устазы Темрезланы Алинагъа, республиканы сабий больницасыны санитар машинасыны водители Хапаланы Арсеннге дагъыда башхалагъа Къарачай-Черкесияны Халкъ Джыйылыууну (Парламентини) Хурмет грамоталарын берди.
Саугъаланнганла да ишлерине уллу багъа берилгенине разылыкъларын билдирдиле.
БАЙРАМКЪУЛЛАНЫ Зульфия.
