Хыйлачыла! Хыйлачыла! Сакъ болугъуз! Кишиге алдатыб къоймагъыз деб, не къадар айтылыб турса да, аманлыкъчылагъа ийнаныб, ахчаларындан къуру къалгъан джердешлерибиз кёбдюле.

Ма бу кюнледе Зленчук станседе джашагъан бир тиширыу кеси къолу бла аманлыкъчылагъа 1 746 076 сомну ашыргъанды.
Эресейни МВД-ны муниципалитетле арасы «Зеленчук» бёлюмюне 52 джыл болгъан джергили тиширыу тарыгъа баргъанды.
Джарсыгъан тиширыу айтхан хапаргъа кёре, анга биреулен телефон бла къонгурау къагъыб, кесин брокерча танытханды, нефть, газ компанияланы акцияларын алыб, биржада иги хайыр тюшюрюр хыйсаб теджегенди. Кесини ётюрюгюне ийнандырыр ючюн, ол «Алтын къалала» ишлерча бир ачха тюшюрюрге боллукъду деб, тиширыуну терилтгенди. Хыйлачыны айтханын этиб, зеленчукчу тиширыу, 1 746 076 сомну талай кереге бёлюб, кеси билмеген счётлагъа ашыргъанды.
Аманлыкъчылагъа алдатханын кеч эсгериб, башын полицияны джергили бёлюмюне атханды.
Кеси чертгенден, ол тиширыугъа быллай ишле бла хайлачыла кюрешгенлери талай кере да айтылгъанды. Алай а ол, уллу хайыр аллыкъма деб, иги джора этиб, кесин алдатыб къойгъанды.
Бусагъатда полициячыла бу аманлыкъ ишни ким этгенин ачыкълар, аны джууабха тартыр мадарла эте турадыла.
КъЧР-ни МВД-сы уа энтда бир кере джамагъатны сакъ болургъа чакъырады.
Багъалы джердешле! Кесамат бегитгинчи ачхагъызны кишиге ашырмагъыз, иш джюрютюрню аллы бла финанс организцияны хапарын толу билирге кюрешигиз. Акцияланы сатыу-алыу бла кюрешгенлени хапарларын Ара банкны официал сайтыны «проверить участника финансового рынка» деген бёлюмюнде табаргъа боллукъду. Законну-джорукъну тамалында ишлеген кредит эмда инвестицион организацияланы юслеринден керекли хапар Эресейни Федерал налог къуллугъуну официал сайтыны «прозрачный бизнес» деген бёлюмюнде барды.

КъЧР-ни МВД-ны пресс-къуллугъу.