Терроризм дегенлей, адамланы эслерине хатерсиз аманлыкъчыла тюшедиле. Аланы къанлы ишлери кёблени джюреклерине бителмезлик джарала салгъандыла.
Бир кесек заман озса да, Бесланда школгъа джыйылгъан сабийле бла устазлагъа, Дубровкада «Норд-Ост» мюзиклге къарай тургъанлагъа, Волгодонскеде эмда башха эресейчи шахарлада атылтылгъан кёб фатарлы юйледе болгъанлагъа, ала кибик, террористлени къолларындан ачыгъан гюнахсыз адамланы барына да бютеу джамагъат бюгюн-бюгече да бушуу этеди.
Бусагъатдагъы терроризм хыйлачы тюрсюннге киргенди, аны ангылагъан къыйыныракъ болгъанды. Терроризм ишлени асламысын кесибизни джаш адамла этгенлери бютюн да бек къыйнайды.
Терористле бусагъатда да, алгъынча, тюзюуюн адамлагъа къатыладыла. «Крокус Сити Холл» концерт залда да, Курск, Брянск областлада кёпюрледе да кишиге хаталары джетмеген адамла ачыгъанларын билесиз.
Джууукълашыр мадар табсала, аманлыкъчыла аскер, кърал, джамагъат къуллукъчуланы да аямайдыла. Онглу адамларыбызны къырыугъа джораланнган ишле Москвада, Балашихада, Краснодарда да этилгендиле.
Алгъын бир иннетли аманлыкъчыла, къауумла къураб, этиучен эдиле терроризм ишлени, бусагъатда уа ала акъыллы болгъандыла. Украинаны бизни къралны онгун алыргъа ууланнган къуллукълары (спецслужбы), ачха бериб, ангылары иги бегимеген, не этгенлерин толу ангыламагъан джаш адамлагъа, мигрантлагъа этдиредиле аман ишлерин.
Власть органланы объектлерин, социал эмда джамагъат учреждениелени, улоу эмда отлукъ инфраструктураны, джорукъ сакълагъан органланы къуллукъчулары бла джамагъат ишчилени, дагъыда башхаланы къурутур муратда 2022-чи джыл байрым (февраль) айда аскер къаугъа башланнгандан 2024-чю джыл арттотур (апрель) айгъа дери 97 диверсион-терроризм иш этилгенди. Аскер комиссариатлагъа 30 кере от салыннганды, темир джолну кереклери 27 кере чотдан чыгъарылгъандыла.
Къаралгъан кёзюуде къоркъуусузлукъну бегитген органла, аманлыкъчыланы заманында ачыкълаб, 230 терроризм ишни тыйгъандыла. Бусагъатда терроризм ишле этерге ГРУ, СБУ дегенча Украинаны бизни къралны онгун алыргъа ууланнган къуллукълары, ётюрюк динни джайыб айланнган халкъла арасы терроризм бирлешликлени келечилери кюрешедиле.
Ала, социал сетле эмда мессенджерле бла байламлылыкъгъа чыгъыб, кеслерини тизимлерине джаш адамланы къошадыла. Аманлыкъчыла акъыл-балыкъ болмагъан адамлагъа кеслерини сёзлерин ётдюрюр ючюн, стриминг платформаланы, онлайн оюнланы хайырландыргъанлары да болады. Террористлени излемлерин мында ангысызлагъа сингдириу бла кёбюсюне тыш къраллада хазырланнган устала кюрешедиле. Ала кеслерине келиширик адамланы иги излеб, сайлайдыла. Интернетде, анда-мында Эресейни аманлагъан, къралны джоругъун, кърал къуллукъчуланы хыртха ургъан, СВО бардырылгъанын джаратмагъан, джашау турмушларына хош болмагъан адамлагъа айырыб эс бёледиле. Ачха-бочха теджеб, болумну ушатмагъанларын алдан билдирген адамланы алдагъан алай къыйын болмайды.
Тыш къралланы келечилери джумушларын этдирирге излеген адамларына алгъа, ары-бери барыб, улоу инфраструктураны, аны кибик башха объектлени суратлагъа тюшюртедиле. Алай этгенлери ючюн, сом-шай джибередиле. Айырыб керекли джерлени суратха тюшюртюб, артда да 1-2 минг сом ашырадыла. Былай къарагъаннга ол алай ауур джумуш да тюлдю, кишиге да заран салмайды. Аманлыкъчыла уа, ол бош джумушну юсю бла кеслерине керекли хапарны аладыла.
Неге от салдыргъанларына кёре, 10-40 минг сом тёлейдиле. Джумушларын бир кере этиб, аланы къапханларына тюшген адамлагъа ычхыныр амал джокъду.
Эресейчиле кеслери диверсион-терроризм ишге къошулургъа излегенлерин билдиргенлери да болады.
Сёзден, джаш адамла кеслери Украинаны миллетчилерине кёлтюргючлюк этген Телеграм-каналлагъа джазылыб, аланы администраторларына кеслерини джумушларын теджегенлери талай кере да белгили болгъанды.
Диверсантла бла террористле, аман ишлерин этиб, башларына бош турургъа мурат этселе да, Эресейни джорукъ сакълагъан органлары алагъа къаршчы кюрешни джетишимли бардырадыла, къралны, джамагъатны къоркъуусузлугъуна къатылгъан аманлыкъчыланы ачыкълайдыла, джууабха тартадыла.
Сёзден, хоншу Ставрополь крайда ФСБ-ны къуллукъчулары 9 адамны тутхандыла. Ала хычаман (май) айны 9-да – Уллу Хорламны кюнюнде – терроризм ишле этерик болгъандыла. Тутулгъанланы сегизи 14-16 джыл болгъан ангылары бегимеген джаш адамладыла.
Дагъыда Москвада темир джолну кереклери болгъан шкафланы джандыргъан 4 аманлыкъчы тутулгъанды. Ала да 20-21 джыл болгъан джаш адамладыла.
Нижегородск областда да 2008-чи джылгъы 2 джаш адамгъа, темир джолда диверсия этерге излегенлери ючюн, терслеу иш ачылгъанды.
Ямалда, артда Омск шахарда аэродромлада тургъан «Ми-8» вертолётла кюйдюрюлген эдиле. Алагъа от 13-16 джыл болгъан сохтала салгъанлары бир сагъатны ичинде ачыкъланнган эди.
Быллай ишле бизни джауубуз заманын бош ашырмагъанын, кесибизни сабийлерибизни къоллары бла бизге къыйынлыкъ салыргъа кюрешгенин кёргюзедиле.
Биз а, алагъа къаршчы не этелебиз? Сабийлерибизни Ата джуртубузну сюерге, къатларында адамлагъа къайгъырыргъа юретебизми? Юретсек а, иги боллукъ эди. Ата джуртун сюйген, джамагъатын багъалатхан адам аллай ишлеге къатышырыкъ тюл эди.
Къарачай-Черкесияны МВД-ны Экстремизмге къаршчы аралыгъы.
