Уруп районда персид архитектура бла джангы межгит ишлене турады. Аны уллулугъу 739 квадрат метрге джууукъду. Ол Преградна станседе орналгъанды. Ишлене тургъан межгитни интерьери мавритан халдады.

– Межгит багъалы материалладан этиле турады. Аны хар оюуу бай ислам маданият хазнаны кюзгюсюдю. Уллу намаз этген бёлмеси барды, ол агъачдан этилгенди. Заманны излемине джууаб этген санитар, джылыу бериучю чоюн тургъан бёлмелери бардыла, – деб билдиргендиле КъЧР-ни Муслиманларыны дин управлениесини пресс-къуллугъунда.
Алгъаракъда къурулуш ишлени къалай баргъанындан хапарлы болур иннетде, Къарачай-Черкесияны муфтийи Эриккенланы Мухаммат хаджи талай нёгери бла келиб кетгенди.
– Джангы межгит кесини ариу архитектурасы бла сейирсиндиреди, аны кибик, ол деменгили эмда чыдамлы метериалладан ишлене турады. Комплексге балконлары да болгъан мийик минара бир тюрлю бир хурмет береди. Межгит районну муслиман джамагъатын бирикдирген аралыкъ боллугъуна бир тукъум ишек джокъду, – деб чертгендиле пресс-къуллукъда.
КъЧР-ни муфтийини оноуу бла бу межгитни быйыл къыркъаууз (сентябрь) айны ал сюреминде ачар мурат барды.