Бу кюнледе «Авангард» аралыкъны залында «Движение первых» деген сабийле бла джаш тёлюню бютеу Эресейде ишлеген джамагъат-кърал къозгъалыуу бла байламлылыкъ джюрютген республикан координацион совети джыйылыу бардырды. Анда координацион советни толтургъан ишлерини, этиллик джумушларыны юслеринден сёз барды.
Ары келгенлени арасында Къарачай-Черкес Республиканы Башчысы бла Правительствосуну Администрациясыны тамадасыны биринчи орунбасары Хубийланы Марат, КъЧР-ни джаш тёлю ишледен министри Тотуркъулланы Ибрагим, регионал бёлюмню тамадасы, дагъыда башхала бар эдиле. Сёз Хубийланы Маратха берилди.
– Бюгюн «Движение первых» деген къозгъалыуну координацион совети, бизни бирге джыйыб, этилген ишлени сюзерге, баджарыллыкъланы белгилерге излейди.
Къарачай-Черкес Республикада «Движение первых» 25 минг фахмулу, кючлери, билимлери, тириликлери болгъан джаш адамланы бирикдиреди.
Бизни республикада, джаш тёлюге аталгъан аралыкъла болуб, 276 ал башланнган, 12 джергили бёлюм ишлейди. Озгъан джыл магъаналы проектлеге 25 минг джаш адам эс бёлгенди. Аланы тирилери Къарачай-Черкесияны атындан федерал площадкалада тыйыншлы сёлешгендиле. Ол сизни ашхы кючюгюзню, башламчылыгъыгъызны, тирилигигизни, алгъа учунмакълыгъыгъызны кёргюзеди.
2025-чи джыл Уллу Хорламны 80-джыллыкъ юбилейини джылы болгъаны ючюн артыкъ бек багъалыды. Сиз патриотлукъгъа юретиуню бегите, джая барыргъа керексиз. Аны тыйыншлысыча этиуде, «Зарница 2.0» деген саулай Эресей проектни регионал этапын джашаугъа киргизиу баш ишлени бирине саналады. Ол республикада 10 минг, бютеу къралда уа мелиуан адамны бирикдиреди, джаш адамланы тарихге, командада ишлерге юретеди.
Сиз бара-бара да джангы бёлюмле ачарыкъсыз, окъуу, джамагъат организацияла бла байламлылыкъ тутарыкъсыз. Хар адам илмуда, культурада, спортда кесини кючюн танытырча мадар табарыкъды.
Ашхылыкъ, игилик этерге тырмашханыгъыз ючюн сау болугъуз. Республикада сабийле, джаш тёлю алгъа барырча, ёсерча мадарла кёбден-кёб къурагъыз, – деди Хубиланы Марат.
Ызы бла «Движение первых» деген сабийле бла джаш тёлюню саулай Эресейде ишлеген къозгъалыууну регионал бёлюмюню советини тамадасы Къочхарланы Алинагъа берилди. Ол быйыл озгъан заманны ичинде этилген ишлени юслеринден толу хапар айтды. Андан сора КЧР-ни джаш тёлю ишледен министри Тотуркъулланы Ибрагим, башхала сёлешдиле.
Узеирланы Хусей.
