Ата джуртну къоруулаучуну джылына аталыб, никкол (июнь) айны 24-де Чечен Республиканы ара шахарында «Россия - Дом народов» деген форум бардырылгъанды. Анга къралны бютеу регионларыны келечилери да къошулгъандыла.
Форумну Миллет ишлени хакъындан федерал агентство бла Эресейни халкъларыны юйю къралыбызны джамагъатын бирикдирир, адамланы патриот ангыларын бегитир муратда къурагъандыла.
Аны баш нюзюрю тарихибизни эсгериуге, тюрлю-тюрлю миллетлени бирикдире, Эресейни халкъларыны маданиятларын, тиллерин, аны кибик башха энчи шартларын сакълаугъа эс бёлдюрюу эди.
Форумгъа Къарачай-Черкесияны миллет ишлерини, кёбчюлюк коммуникацияла бла басманы хакъындан министри Мурат Есенеевни башчылыгъы бла бизни республиканы келечилери да баргъан эдиле.
Анда Эресейде джашагъан миллетлени бирикдириу, бурундан келген ашхы адетледеча барыбызгъа да сыйлы ишлени багъалатыу, ата-бабаланы джигитликлерин юлгюге тута, керти патриотла ёсдюрюу дегенча темалагъа сёлешиннгенди.
Форумгъа къошулгъанлагъа миллетле арасы келишиулюкню ёсдюрюуге аталгъан проектлени бирге толтурур, башламчылыкъланы джашаугъа сингдирир мадарла да айтылгъанды.
Сынам алмашдыра...
Ол кюн Грозныйде «Шимал Кавказны журналистлери» деген регионла арасы форум да бардырылгъанды. Ол форумгъа ШКФО-ну журналистлери, блогерлери, кърал эмда джамагъат къуллукъчулары, миллет эмда маданият бирлешликлерини келечилери къошулгъандыла.
Къарачай-Черкесияны «Ногай давысы» деген республикан газетини баш редактору Алтынай Атуова да анда болгъанды.
Алтынай Юнусовна «Информационная политика в продвижении идей национального единства и популяризации традиционных духовно-нравственных ценностей» деген секцияны ишине къошулгъанды. Ол «Грозный» деген кърал телерадиокомпанияны студиясында бизни республикада чыгъарылгъан газетлени хапарларын айтханды, «Кунацкая» деген проектибизге айырыб эс бёлдюргенди.
Таурухланы дуниясы
Дагъыда никкол (июнь) айны 24-де Грозный шахарда Шимал Кавказны эмда Кърымны халкъларыны таурухлары бла орус таурухланы «В тридевятом царстве…» деген регионла арасы фестивалы болгъанды. Аны да Миллет ишлени хакъындан федерал агентство бардыргъанды.
Ол фестивалгъа башха регионланы келечилери бла бирге бизни джердешлерибиз да къошулгъандыла.
Адыге-Хабль муниципал районну Садовое элини орта школуну директору Блимгъотланы Эльвира бла «Сундучок» деген театрыны тамадасы Гогуйланы Светлана фестивалгъа фахмулу сохталаны элтгендиле.
Чечен Республиканы «ВАЙНАХ» деген кърал тепсеу ансамблини концерт залыны сахнасында Къарачай-Черкесияны сабийлери «Репка» деген халкъ таурухну салгъандыла.
Фестивалгъа къошулгъанланы оюнларына «За лучшую театральную постановку», «За обаяние и трогательность сказочного образа», «За лучший костюм», «За музыкальное исполнение», «За лучшее оформление сцены», «За мисс артистичность», «За мистер талант» дегенча номинациялада багъа берилгенди.
Садовое элни орта школуну келечилери «За обаяние и трогательность сказочного образа» деген номинацияда джетишимли болгъандыла. Фахмулу сохтала дипломла, саугъала алыб, къууаныб къайтхандыла.
«Сабийле Къарачай-Черкесияны атын махтау бла айтдырдыла. Ала фахмуларын кёргюздюле, сахнада бир-бирине кёл бере, къауумну къурамында ишлеуде сынам алдыла. Фахмулу сабийлерибиз бла ёхтемленебиз.
Бизге базыб, къураб, аллай уллу фестивалгъа къошулургъа ашыргъаны ючюн, Къарачай-Черкесияны Билим бериу бла илмуну хакъындан министерствосуна да разылыгъыбызны билдиребиз», – дейди Садовое элни орта школуну директору Блимгъотланы Эльвира.
СОЛТАНЛАНЫ Зульфия.
