Бу кюнледе 20 джыл болгъан бир къыз полициягъа тарыгъыу къагъыт джазгъанды.

Аны тарыгъыууна кёре, ол танымагъан биреулен, телефон бла кесин Кърал джумушланы порталыны къуллукъчусуча танытыб: «Аманлыкъчыла сени энчи кабинетинге киргендиле, анда хапарынг бла хайырланыб, кредит алыргъа башлагъандыла. Аланы тыяр ючюн, Эресейни Финанс мониторинг бардыргъан федерал къуллугъуну келечиси бла байламлы бол», – деб, ол кърал къуллукъчуну мессенджерледе ник-неймин ашыргъанды.
Бу къыз ол айтханны этгенди. Эресейни Финанс мониторинг бардыргъан федерал къуллугъуну келечиси анга: «Энчи хапарынгы терроризм ишлеге ууланнган аманлыкъчылагъа бериб, алагъа кредит алыргъа болушханынг ючюн, сеннге терслеу иш ачылгъанды», – дегенди.
Ызы бла ол къызгъа «ФСБ-ны къуллукъчусу» сёлешгенди. Ол: «Банкда ачхангы алыб, терминал бла теджелген счётха ашырыргъа керексе», – деб, таргъа тыйгъанды.
Асыры къоркъгъандан джарлы къыз кеси къолу бла хыйлачы къауумгъа 846 999 сомун ашыргъанды.
Бусагъатда полициячыла, РФ-ны Терслеу кодексини 159-чу, 272-чи статьялары бла ишле ачыб, бу аманлыкъны толу ачыкълар мадарла эте турадыла.
 Аманлыкъчыла, кеслерин кърал къуллукъчулача танытыб, хыйлачыла алай-былай эте башлагъандыла, аладан сакълар ючюн, рысхынгы ары-бери кёчюр деб, адамланы алдаргъа ёчдюле. Ётюрюклерине ийнандырыр ючюн, ала Кърал джумушланы порталында энчи кабинетлеге керти да киредиле, алай бла ачха урларгъа хазырланадыла.
Ётюрюкчюлеге алдатмаз ючюн, ким болса да, кесин не уллу къуллукъчуча танытса да, аны айтханын этиб, телефонларыгъызгъа келген кодланы айтмагъыз. Ол кодла бла аманлыкъчыла сизни энчи кабинетлеригизге киредиле.
Аккаунтугъузгъа башха адам киргенине ишек этсегиз, эрлай огъуна паролугъузну ауушдуругъуз, банкыгъызны джергили бёлюмю бла да, Кърал джумушланы порталыны болушлукъ этген къуллугъу бла да, полициячыла бла да байламлы болуб, хапарыгъызны билдиригиз.
Кърал органланы келечилери ишни юсюнде мессенджерле бла байламлылыкъ джюрютмегенлерин эсигизде тутугъуз. Терслеу ишлени юслеринден ушакъла да не интернетде, не телефон бла этилмейдиле, аны билигиз.
Банкланы къоркъуусузлукъну хакъындан системалары, ишек этилсе, ачханы бир счётдан башха счётха атаргъа тыйгъыч саладыла. Аны ючюн аманлыкъчыла, ачханы счётугъуздан алыб ашырыгъыз, дерге тюзелгендиле.
Сакъ болугъуз! Танымагъан адамларыгъыз бла сёлешмегиз. Сёлешгенигиз болса да, ала айтханнга ийнаныб къалмай, ышаннгылы хапар билирге кюрешигиз.
Къоркъмагъыз, ашыгъыб джукъ этмегиз. Аманлыкъчыла сагъыш этерге заман бермей терилтедиле джердешлерибизни.

КъЧР-ни МВД-ны пресс-къуллугъу.