Эресейни кюнюнде сабийле туууучу республикан юйде, кюнню биринчи джарымында, дуниягъа тёрт сабий джаратылгъанды – эки джашчыкъ бла эки къызчыкъ.

Къарачай-Черкесияны Башчысы Темрезланы Рашидни атындан джангы туугъанланы КъЧР-ни саулукъ сакълау министри Динара Камурзаева алгъышлагъанды.
– Деу къралны гитче адамчыгъы, сен бизни келир заманыбызса. Сени ашхы адам болуб ёсеригинге, туугъан джеринг бла, Ата джуртунг бла ёхтемленнигинге, хайыр келтириб халал уруннугъунга ийнанама. Ата-ана джылыу кёрюб ёсеригинги, къралны къайгъырыуун сезеригинги, Эресей къурагъан таблыкъла бла окъууда, джашауда да хайырланныгъынгы таза джюрекден излейме, – деб джазылгъанды алгъышлауда.
Министр аналагъа да саугъала бергенди. Аналаны атындан сёлешген Жанетта Кокова бешинчи сабийин табханын, врачлагъа разылыгъын, сабийи дуниягъа Эресейни кюнюнде джаратылгъанына бек къууаннганын чертгенди.
Быйыл джылны аллындан бери бизни республикада 1500-ге джууукъ сабий туугъанды. Сабийле туууучу юйде ЗАГС-ны кабинети ачылгъанды, анда туугъан сабийлеге регистрация этедиле. Больницадан чыкъмагъанлай анала бир кюнню ичине сабийлерини биринчи документлерин алыргъа боллукъдула.