Никкол (июнь) айны 11-де Къарачай-Черкесияны ара шахарында Медицина къуллукъчуну кюнюне да, Социал къуллукъчуну кюнюне да аталгъан къууанч джыйылыула болдула.

Ол джыйылыулада Къарачай-Черкесияны Башчысы Темрезланы Рашид, республиканы Халкъ Джыйылыууну (Парламентини) Председатели Александр Иванов, КъЧР-ни Правительствосуну Председателини орунбасары Джанибек Суюнов дагъыда башха кърал къуллукъчула джердешлерибизни саулукъларын бакъгъан, аланы джанларына джарагъан адамланы джылы алгъышладыла.
Кюн сайын ауруугъанланы багъыб, джарсыгъанлагъа тынгылаб, инджилгенлени хар бирине болушур мадар излеб тургъан джууаблы иш болгъаны бла бирге адамны джюрегине къыйын тийгенин, аны ючюн ол санагъатлада ишлерге къуру да къайгъырыулу, хар адамны джарсыууна да тыйыншлы эс бёле билген устала ишлегенлерин чертиб, медиклеге да, социал къуллукъчулагъа да джюрек разылыкъларын билдирдиле.
«РФ-ны Президенти Владимир Путин белгилеген, къралыбызны Правительствосу регионла бла бирге толтургъан кърал политикада баш магъана адамгъа къайгъырыу бла джамагъатны джашауун игилендириуге бериледи.
Аны ючюн КъЧР-де саулукъ сакълаугъа тыйыншлы эс бёлюнеди. Белгиленнген борчну уа сёзсюз да этимли усталарыбыз толтурадыла», – деб, Темрез улу махтаулу ишлегенлени саугъалады.
Санагъат байрамларында бюсюреулю ишлеген медиклени бир къаууму «КъЧР-ни махтаулу врачы», «КъЧР-ни саулукъ сакълаууну махтаулу къуллукъчусу» деген сыйлы атла бла, бирсилери да республиканы Башчысыны Разылыкъ къагъытлары бла саугъаландыла.
Темрез улу республиканы 4 социал сабий учреждениесин да Разылыкъ къагъытла бла саугъалаб, алада ишлегенлеге уллу бюсюреу этди. Республикан дараджада джакъсыз къалгъан, ёксюз болгъан, къыйын болумгъа тюшген сабийлеге къарагъан учреждениелеге болушлукъ этилгенлей турлугъун да чертди.
Ол кюн КъЧР-ни Халкъ Джыйылыуу (Парламенти) бла Правительствосуну Хурмет къагъытлары бла социал санагъатда ишлеген 40 уста саугъаланды.