Никкол (июнь) айны 14-де, РФ-ны Кърал Думасыны VIII-чи чакъырыууну депутаты, сыйлы джердешибиз Ёзденланы Джашарбекни эсгериуге аталыб, Джёгетей Аягъы районну ипподромунда ат чабдырыудан эришиуле ётгендиле.
Ол ишге Къарачай-Черкесияны Башчысы Темрезланы Рашид, РФ-ны Федерал Джыйылыууну Федерация Советини сенаторлары, РФ-ны Кърал Думасыны КъЧР-ден депутаты Ёзденланы Солтан, КъЧР-ни Башчысыны эмда Правительствосуну Администрациясыны тамадасы Мурат Озов, Къарачай-Черкесияны муфтийи Эриккенланы Мухаммат хаджи, республиканы шахарлары бла районларыны башчылары, Ёзденланы Джашарбекни джууукълары-тенглери дагъыда башхала къошулгъан эдиле.
Республиканы Башчысы Темрезланы Рашид, джыйылгъан джамагъатны аллында сёлеше, Ёзденланы Джашарбекни сыйына аталыб бардырылгъан чаришле ашхы иш болуб къуралгъанларын чертгенди.
– Бюгюн Къарачай-Черкесияда халал джюрекли, ашхы адамны эсибизге тюшюребиз.
Ёзденланы Джашарбекни тамада къарнашымча, ышаннгылы нёгеримча кёре эдим. Республикабызда аны атын иги бла сагъынмагъан джокъду. Кърал иши бла бирге Ёзден улу джашауун халкъына, бютеу Къарачай-Черкесиягъа къуллукъ этиуге атагъанды. Ол къыйын болумлагъа, джарсыулагъа тюшгенлеге къайгъыргъанлай тургъанды. Парламентни депутаты, КъЧР-ни табигъат байлыкъла бла экология министри, Кърал Думаны депутаты болгъан кёзюулеринде адамлагъа, миллетлерине, динлерине да къармай, болушлукъ этиб тургъанды. Туугъан элине, районуна, республикагъа да кёб зат бла болушханды. Не заманда да къралыбызны керти патриоту болгъанлай тургъанды. Аны бла бирге, Ёзденланы Джашарбек ашхы юйдеги ёсдюргенди. Бюгюнлюкде джашы Солтан аны джолу бла барады – ол да РФ-ны Кърал Думасыны Къ-ЧР-ден депутатыды, республикада джашагъанлагъа болушады, – дегенди Темрезланы Рашид.
Республиканы Башчысы белгили джердешибизни сыйына атаб, эришиуле джыл сайын да бардырыб турургъа теджегенди.
Къарачай-Черкесияны Башчысыны ёчю салыннган биринчи эришиуледе атчыла 1800 метр узакълыкъгъа чабхандыла. Анга таза къанлы ингилиз тукъумлу атла къошулгъандыла. Бу чаришде Гитче Къарачай райондан Шыдакъланы Дахир Симфонист аты бла хорлагъанды.
Экинчи оруннга Кип Май Сикрет аты бла Чотчаланы Рамазан, ючюнчю оруннга да Мастер Команд аты бла Каппушланы Азамат чыкъгъандыла.
Темрезланы Рашид биринчи эришиуледе алчы орунланы алгъанланы саугъалагъанды.
Бютеулей да 6 чариш къуралгъан эди. Алагъа къошулуб, ёчлю орунланы алгъанланы барына да саугъала берилгендиле.
Къарачай-Черкесияны белгили артистлери джырлаб, тепсеб, алайгъа джыйылгъанланы кёзлерин ачыб тургъандыла.
