Эресейни кюнюнде Черкесск шахарны Джарыкълыкъ къаласында тутхан ишлерин бет джарыкълы баджаргъан джердешлерибизге эмда спортда, окъууда махтаулу болгъан, паспорт алыргъа джыллары джетген сохаталагъа аталгъан къууанч джыйылыу болгъанды.
Ол къууанчха Къарачай-Черкесияны Башчысы Темрезланы Рашид бла бирге РФ-ны сенаторлары Салпагъарланы Ахмат бла Крым Казаноков, РФ-ны Кърал Думасыны КъЧР-ден депутаты Ёзденланы Солтан, КъЧР-ни Правительствосуну Председатели Мурат Аргунов, РФ-ны Президентини ШКФО-да Толу эркинликли келечисини аппаратында КъЧР-ге къарагъан баш инспектор Тимур Макоев, Черкесск шахарны мэри Алексей Баскаев дагъыда башхала къошулгъандыла.
Республиканы Башчысы, джыйылгъанланы Эресейни кюню бла алгъышлай, РФ-ны Президенти Владимир Путин кёргюзген джол бла баргъаныбызны, къралыбызны Правительствосу кёлтюргючлюк этгенини себебинден, Къарачай-Черкесияны социал-экономика болумун игилендириуге аталгъан миллет проектле, федерал программала джетишимли толтурулгъанларын, саулукъ сакълау, билим бериу, спорт, эл мюлк, туризм дегенча санагъатларыбыз иги ёсюм алгъанларын чертгенди.
Ата джуртубузну айныууна юлюш къошхан адамлагъа разылыгъын билдире, Темрезланы Рашид: «Баш байлыгъыбыз а, сёзсюз да, адамларыбыздыла. Биригиб уруннганы бла Къарачай-Черкесиягъа да, Эресейге да ёсюм алдырыб баргъан кёб миллетли джамагъатха бу байрамны магъанасы уллуду.Бюгюн былайда устазла, врачла, юристле, экономистле, эл мюлк бла кюрешгенле, дагъыда къралыбызны тамблагъы кюнюн ышаннгылы болдурургъа уллу юлюш къошхан башха устала бардыла.
Ала мында джигер уруннган кёзюуде аскер къаугъагъа къошулгъан джигитлерибиз да къанлы урушлада къралыбызны политикасын джакълайдыла, Эресей кючлю, башхалагъа бой бермезлик кърал болгъанын танытадыла.
Бюгюннгю Эресей тюрлю-тюрлю динлени, миллетлени келечилерин бирикдирген, джамагъаты келишиулю джашагъан деу къралды.
Эресей Федерацияны тарих джолу башхалагъа ушамайды. Аны тамалына бютеу адамлагъа да бирча багъалы затла салыннгандыла. Бизни кючюбюз бирликде болгъанына, барыбыз да республикабызны, къралыбызны къарыулу этерге излегенибизге ийнанама», – дегенди.
Алгъышлау сёзюн бошагъанлай Къарачай-Черкесияны Башчысы Темрезланы Рашид тутхан ишлерин бет джарыкълы баджаргъан джердешлерибизге кърал саугъала, акъыл-балыкъ болгъан джетишимли, фахмулу джашла бла къызлагъа да биринчи паспортларын бергенди.
Эм алгъа Эресей Федерацияны Президенти сыйлы атлагъа тыйыншлы кёрген джердешлерибиз саугъаланнгандыла.
Знаменка элни гимназиясыны директору Каппушланы Сейитбийге «Народный учитель Российской Федерации», Джёгетей Аягъында 5-чи номерли орта школну математикадан устазы Эриккенланы Халиматха «Заслуженный учитель Российской Федерации», «Олимпик» деген республикан спорт школну директору Бостанланы Асланнга да «Заслуженный работник физической культуры Российской Федерации» деген сыйлы атла берилгендиле.
«Архыз 24» телеканалны баш редактору Батчаланы Мадина, «Защитники Отечества» деген кърал фондну КъЧР-де бёлюмюню социал координатору Замир Гусов, Зеленчук станседе В.П. Леонов атлы школну устазы Юлия Капалкина, «Бирикген Эресей» партияны регионал бёлюмюню толтуруучу комитетини тамадасыны орунбасары Катчиланы Лидия, КъЧР-ни Джамагъат палатасыны тамадасы Елена Ляшова да РФ-ны Президентини Разылыкъ къагъытлары бла саугъаланнгандыла.
Темрез улу джылы келген хурметли джердешибизге, урунууну ветераны Къарабашланы Казимге «За заслуги перед Карачаево-Черкесской Республикой» деген орденни бергенди.
Къууанч джыйылыуда илму, билим бериу, саулукъ сакълау, маданият, экономика, спорт, промышленность дегенча санагъатлада тирилик танытыб, махтаулу ишлеген джердешлерибизни бир талайы да республиканы сыйлы кърал саугъаларын алгъандыла.
Алайда республиканы Башчысыны къолундан биринчи паспортларын алгъан джашла бла къызла да бек къууаннгандыла.
Темрезланы Рашид алагъа: «Багъалы сабийле! Эресей Федерацияны адамы (гражданин РФ) болгъан уллу сыйды. Сыйлы атны джюрютген а не заманда да джууаблы болады. Ол джууаблылыкъны ангылагъан, тюзлюкню сюйген, адетге-намысха, джорукъгъа сыйыннган, халал, келишиулю адамла болугъуз. Ашхылыкълагъа учундургъан, джигер урунургъа юретген, Ата джуртубузну сюйген къартларыбыздан юлгю алыгъыз. Джуртубузну келир заманы сизни къайгъырыуугъузгъа кёре боллукъду» – дегенди.
