Джаш-къарт, уллу-гитче болса да, хыйлачылагъа башхасы джокъду. Ма, бу кюнледе аланы бири, акъыл-балыкъ болмагъан къызчыкъны алдаб, аны анасыны 160 минг сомун алгъанды.

Ачхасындан къуру къалгъаныны хапарын 48 джыл болгъан тиширыу Эресейни МВД-ны Джёгетей Аягъы бёлюмюнде айтханды.

Хапаргъа кёре, ол тиширыуну акъыл-балыкъ болмагъан къызыны телефонуна биреулен, къонгурау къагъыб, кесин банкны къуллукъчусуча танытханды. Ол адам: «Хыйлачыла анангы атына кредит ала башлагъандыла, аланы тыяр ючюн, СМС бла келген кодну айтыргъа керексе», – дегенди.

Сабий да, анга ийнаныб, кодну айтханды. Ызы бла тиширыуну счётундан 160 минг сом чакълы бир ачха джокъ болгъанды.

Ол тиширыуну тарыгъыуу бла РФ-ны Терслеу кодексини 158-чи статьясыны 3-чю бёлюмюню «г» кесегини тамалында иш ачылгъанды. Полициячыла бу аманлыкъны ким этгенин ачыкълар мадарла эте турадыла.

Къарачай-Черкесияны Ич ишлени хакъындан министерствосу уа республиканы хурметли джамагъатына тюзюуюн адамланы ачхаларын алыргъа ууланнган аманлыкъчыла телефон бла алдаргъа ёч болгъанларын эсгертеди.

Ким, къалай сорса да, энчи хапарыгъызны, телефонугъузгъа келген кодну кишиге да айтмагъыз.

Танымагъан-билмеген адамыгъыз телефон бла къонгурау къакъса, сёлешмей къойгъандан игиси джокъду. Бир ишексиз, ол хыйлачы болуб чыгъарыкъды!

КъЧР-ни МВД-ны пресс-къуллугъу.