Муслиманланы сыйлы байрамларыны бири Къурман байрамда республикабызны шахарларында, эллеринде къууанч джыйылыула болгъандыла, къурманлыкъла этилгендиле. Хар ийманлы адам бир-бирине игилик, ашхылыкъ тилей, Бир Аллахха разылыгъын билдиргенди.
Къобан районну Пристань элинде да Къурман байрамгъа аталыб, къурманлыкъ этилгенди, спорт ишле бардырылгъандыла. Ол къууанч иш эртденден ингирге дери баргъанды.
Пристань элни джамагъаты: эркишиле, тиширыула, джашла, къызла, сабийле къарт аккала бла аммала биригиб, бу джумушланы этерге оноулашыб, ишни алай къурагъандыла. Алайгъа джыйылгъан адамланы арасында Къарачай-Черкес Республиканы муфтийи Эриккенланы Мухаммад хаджи, Къобан районну тамадасы Семенланы Ахмат, Николаевское элни тамадасы Орусланы Хасан, элни джамагъаты, тыш элледен, шахарладан, республикаладан баргъан къонакъла болгъандыла.
Джыйылгъанланы аллында республиканы муфтийи Эриккенланы Мухаммад хаджи сёлешиб, халкъны бирикдириуню юсюнден айтханды. Джаш адамла уллу айтханны этиб, аланы аталары, аналары балаларындан къууаныб, рахатлыкъда джашарча атлауну юсюнден айтханды. Миллетибизге, къралыбызгъа мелхумлукъ, игилик, миллетлеге ийман теджегенди. Ол Къарачай-Черкесияда рахатлыкъ, игилик, бирикмеклик орун алыб, халкъла шохлукъда джашагъанлары ючюн, республиканы Башчысы Темрезланы Рашидге разылыгъын билдиргенди. Башха талай ашхы затны юсюнден айтханды. Андан сора Семенланы Ахмат КъЧР-ни Башчысы Темрезланы Рашидни эмда кесини атындан джыйылгъан джамагъатны джарыкъ байрам бла алгъышлагъанды. Ол Уллу Аллахдан кёб ашхылыкъла, игиликле тилегенди. Башхала да сёлешгендиле.
Митингден сора, алгъы бурун атла бла белгиленнген джолда чабышхандыла. 35 атлы 47 километр узакълыкъгъа баргъандыла. Пристандан чыгъыб, Гитче Къарачай районну юсю бла, ташлы, зыгъырлы, топуркълы джерле бла ёзенлеге тюшгендиле, ауушлагъа чыкъгъандыла, сууладан ётгендиле, алай бла Джёгетей Аягъы районну джеринде да айланыб, ызларына къайтхандыла. Атла тюрлю-тюрлю тукъумлу, джылгъыла болгъандыла. Джолда джарсыгъан, заран джетген болмагъанды. Болум таб къуралыб, джашла бир-бирин джокълай, белгиленнген джерлеге рахат барыб къайтхандыла. Ала атларын чыныкъдыргъандыла, сынагъандыла.
Биринчи орунну Байрамукъланы Маратны аты бла Мырзаланы Хусей алгъанды. Экинчи орунну Байрамукъланы Маратны аты бла Къоркъмазланы Дахир алгъанды. Ючюнчю оруннга Байрамукъланы Хаджи-Даутну аты бла Байрамукъланы Джатдай ие болгъанды. Тёртюнчю орунну Батчаланы Рустамны аты бла Семенланы Бияслан алгъанды. Бешинчи орунну, кесини аты бла Боташланы Самат алгъанды.
Биринчиге 150 минг сом бла тай, экинчиге 100 минг сом бла тай, ючюнчюге 50 минг сом бла тай, тёртюнчюге тай, бешинчиге къочхар берилгенди.
Джергили эмда тышындан келген джашла кючлерин сынай, къарыуларын аямай кюрешиб, алчы орунну алыр муратда эришиб, джау джибге ёрлегендиле, гир кёлтюргендиле, джиб тартхандыла, къол таш атхандыла. Бардырылгъан ишлени ахырында хорлгъанлагъа, ёчлю орунланы алгъанлагъа къойла берилгендиле.
Тепсиле джасалыб, алайгъа баргъан адамланы миллет хантла бла сыйлагъандыла.
Ата-бабадан келген бу ашхы адетле, унутулуб къалмай, джаш тёлюню арасында тыйыншлы орун алыб, ёсе барадыла. Ол ишни юсюнде джылы келген къартланы да энчи юлюшлери барды. Адамла ышара-кюле, бир-бирине къууанч хапарла айта, ашхылыкъ, игилик теджей къууаннгандыла, Уллу Аллахха махтаула бергендиле, ауушхан адамлагъа, саулагъа да тилекле этгендиле. Джуртубузгъа, халкъыбызгъа, республикабызгъа, Эресей къралыбызгъа тынчлыкъ, рахатлыкъ, мелхум джашау тилегендиле.
Узеирланы Хусей.
