Арт кёзюуде Къарачай-Черкесияда тюзюуюн адамланы атлары бла кредитле алгъан, интернетде сатыу-алыу этген джердешлерибизни алдагъан хыйлачыла эсебсиз кёб болгъандыла.

Ма, кёб болмай да Псыжда джашагъан биреулен, «БМВ Е38» машинасына керек алама деб, кесин алдатханды. Ол адам интернетде кесини машинасына джараулу керек сатылгъан билдириуню окъуб, барыбызда хайырланнган мессенджерде аны джазгъан адам бла байламлы болгъанды. Ол, керекни алыргъа, келтиртирге сёлешгенди. Аны ючюн керекни сатханны счётуна 44 000 сом да ашыргъанды. Бир ыйыкъ чакълы бирден ол адамгъа аны машинасына чыртда келишмеген бир затлары бла посылка келгенди. Сатыучу бла байламлы болуб, гурушхасын айтыргъа излесе, ол джууаб бермей къойгъанды. Псыжчы, кесин алдатханын ангылаб, полициядан болушлукъ излегенди.
Башха терслеу ишни юсю бла тинтиуле бардыра тургъан полициячыла хыйлачыла бир адамны энчи хапарын иелегенлерин, андан алгъа да Черкесскеде джашагъан 23 джыл болгъан бир къызны энчи данныйлери бла кредитге 29 807 сом алыннганын ачыкълагъандыла. Ол халда республикан аралыкъда джашагъан дагъыда эки адам джарсыгъанды.
Бу адамла бары да сакъ болургъа кереклисин билгендиле, алай а хыйлачылагъа алдатыб къойгъандыла.
Бусагъатда полициячыла, тинтиу ишле бардырыб, ол аманлыкъланы этгенлени ачыкълар мадарла эте турадыла. КъЧР-ни МВД-сы уа энтда бир кере республиканы джамагъатын сакълыкъгъа чакъырады.
Багъалы джердешле! Кесигизни неда эт-джен адамыгъызны ким болса да алдаргъа излегенин билгенлей, полициягъа хапар беригиз.
Алдатханла уа полицияны джергили бёлюмюне не къадар дженгил джетигиз.

КъЧР-ни МВД-ны пресс-къуллугъу.