Мындан алда Алчакъланы Ханапийни джашы Рамазан тенглери бла, «Кубок Кавказа» эришиулени къурагъанла да къошулуб, Сабийлени джакълауну халкъла арасы кюнюне атаб, сууаблыкъ иш этгендиле.

Джашла Учкулан – Теберди тау маршрутну атла бла баргъандыла. Ала табигъатны сейир джерлерине къарай, ёзенлени, ауушланы, тауланы онглай, кёмюк этиб къызыу баргъан чокъуракъ сууладан ёте, ариулукъда алгъа учуннгандыла. Шимал Кавказ федерал округну регионларындан, Ставрополь крайдан 200-ге джууукъ атлы ташлы, зыгъырлы дуппурлагъа ёрлей, тар сокъмакъ джолчукъланы барыб, тюзюрекге чыгъыб бир-бирин джокълай, ойнай-кюле, арада шохлукъну кючюн бегите, бу маршрутда да атларын сынагъандыла.
Сабийлени джакълауну халкъла арасы кюнюне аталыб бардырылгъан ол ашхы ишни юсюнде джыйылгъан ачхадан, сабий юйлени кереклилерине деб, Дагъыстан, Къабарты-Малкъар, Къарачай-Черкес Республикалагъа, Сочиге 160 мингишер сом ийилгенди.
Бу сууаблыкъ ишге республикадан, къралны башха регионларындан да кёб адам къошулгъанды.
Бизни регионда быллай ашхы проектле джашаугъа киргизилгенлери респуликаны джетишимиди. Ол адамланы арасында къарнаш шохлукъну кючюн бегите, ат спортну ёсюмюне энчи юлюш къошады.
Къарачай-Черкесияны Физкультура бла спорт министерствосу бардырылгъан ишни аягъында таула бла ётюуге къошулгъанлагъа эсде къаллыкъ сертификатла бергенди.

Узеирланы Хусей.