Уллу Хорламны 80-джыллыгъына аталыб, Билим бериу санагъатны ишчилерини саулай Эресей профсоюзу сабий сурат салыуну конкурсун баямлагъан эди.

Ол «Из одного металла льют медаль за бой, медаль за труд» деген темагъа аталгъанды.
Бу кюнледе Билим бериу санагъатны ишчилерини саулай Эресей профсоюзуну КъЧР-де организациясы ол конкурсну республикан кёзюуюню эсеблерин чыгъаргъанды.
Конкурсну баш мураты тёлюлени арасында байламлылыкъ тутуу, сабийлени ариулукъгъа, патриотлукъгъа, уллугъа сый бериуге юретиу, профсоюз организацияны къурамында болгъанланы сабийлерин, туудукъларын тюрлю-тюрлю ишлеге тартыу, тарихге эслерин бёлюу, профсоюз къозгъалыуну дараджасын кёлтюрюу, ёсюб келген джаш тёлю сагъыш этерча, аланы суратлау чыгъармачылыкъларын кёлтюрюрча мадарла къурауду.
Конкурсха адамла кеслери эркинликлери бла къошулгъандыла. Бир адам этген, талай адам бирге этген суратла да болгъандыла, ала да конкурсха киргизилгендиле. Бу конкурсха Эресейде, регионла арасы профсоюзлада ишлегенлени 6 джылдан 18 джылгъа дери сабийлери къошулгъандыла.
Конкурсну излемине кёре, сабийле аны темасы бла байламлы суратла салгъандыла. Аланы сабийле къоллары бла, тюрлю-тюрлю суратлау материалла бла хайырлана, этгендиле. Компьютер бла этилген саналмайды. Суратны арт джанында этген адамны аты, тукъуму джазылгъандыла.
Конкурсну регионал дараджада финалына чыкъгъанла сабий сурат салыуну саулай Эресей дараджада профсоюз конкурсуна къошуллукъларына шагъатлыкъ дипломла алгъандыла. Конкурсда иш этиб къуралгъан номинациялада хорлагъанлагъа ёчле, багъалы саугъала бергендиле.

(Бизни корр.).