Аскер къаугъаны биринчи кюнлеринден башлаб, Украинада бола тургъан ишледен бютеу джамагъат хапарлы болургъа ашыгъады.
Анда, аскер борчларын мийик дараджада толтургъанлары ючюн, кърал саугъалагъа тыйыншлы болгъан джердешлерибизни хапарлары келсе, ол сюйюмчюлени бир-бирибизге айтыб, кёбчюлюкге джаябыз. Кеслерине да, туугъан джуртларына да махтау келтирген батыр уланланы эт-джен адамлары бла бирге ёхтемленебиз.
Украинаны джергили джамагъатын къоруулай, анда миллетни рахат джашаугъа чыгъарыр ючюн, джанларын берген джердешлерибизни хапарлары келсе уа, аланы юйюрлери бла бирге бютеу Къарачай-Черкесия бушуу этеди. Аллай хурмет бла керти дуниягъа кетген уланланы атларын ёмюрлюкге сакълар муратда республиканы джер-джеринде эсгериу ишле этиледиле.
Хычаман (май) айны 29-да Джангы Джёгетей элни орта школунда болгъан джыйылыу да аллай ишлени бири болду.
Украинада уллу джигитлик этиб джан берген батырлагъа – Къаракетланы Хамзатны джашы Темирлан бла Орусланы Солтан-Хамитни джашы Асланнга – кеслери окъуб чыкъгъан школларында мемориал къангала ачылдыла.
Антларына керти джигитлени атларын ёмюрлюкге сакълаугъа джораланнган ишге аланы джууукълары-тенглери бла бирге КъЧР-ни Халкъ Джыйылыууну (Парламентини) депутатлары, Джёгетей Аягъы районну администрациясыны къуллукъчулары, ол тёгерекде джашагъанла, Темирлан бла Асланны таныгъанла-билгенле да къошулгъан эдиле.
Мемориал къангала ачылгъан кёзюуде школну арбазында талай джылны Эресей Федерацияны Кърал Думасыны депутаты болуб тургъан Эриккенланы Ахмат, КъЧР-де СВО-ну ветеранларыны бирлешлигини тамадасы Мутчаланы Дахир, Джёгетей Аягъы районну Думасыны председатели Тебуланы Шамил, Джёгетей Аягъы районну администарциясыны башчысыны орунбасары Светлана Лещенко, дагъыда башхала бар эдиле.
Джыйылгъанла миллетчиле бла къанлы урушлада, Ата джуртха кертиликлерин таныта, къралыбызны рахатлыгъын сакълар ючюн, джашлай ёлюб кетген уланланы эсгердиле. Ахыр тылпыуларына дери антларына, къралларына керти болгъан патриотланы ёсдюргенлери ючюн, аланы аталарына-аналарына бюсюреу этдиле, бу къыйнлыкъны кёлтюрюрге уллу тёзюм теджедиле.
Джёгетей Аягъы эмда Гитче Къарачай районлагъа къарагъан аскер комиссар Андрей Баховчук джашланы СВО-гъа ашыргъан кёзюуюн эсине тюшюрюб, джыйылгъанланы джыламсыратды.
– Юрениуледен келиб, лейтенант чында аскер къаугъагъа кете тебреген заманында Темирланны айтхан сёзлерин ёмюрде да унутурукъ тюлме.
Кесигизни сакълагъыз, Хорлам бла къайтыгъыз дегенимде, ол ышарыб: «Джигитле болуб къайтырыкъбыз, къайгъырмагъыз», – деб джууаб берген эди. Керти да джигитле болдула. Биз ала бла ёхтемленебиз, бу батыр джашланы ёлюб кетгенлерине аланы эт-джен адамлары бла бирге бушуу этебиз, – деди ол.
– Джигитлик къанында болгъан Темирлан андан башха джууаб берлик да тюл эди. Ол кёб джигитле ёсген юйюрденди, Эресей Федерацияны Джигити Къаракетланы Юнюсню къарнашыны туудугъундан туугъанды. Сабийлигинден Ата джуртха сюймекликни магъанасын ангылаб ёсгенди, – деди Москвада Уллу Хорламны 80-джыллыгъына аталгъан парадха къошулуб келген 92-джыллыкъ амма, Хачирланы Рабият да.
Къалгъанла да, Орусланы Аслан бла Къаракетланы Темирланны ашхы шартларын эсгерте, аланы джигитликлери башхалагъа юлгю болгъанын айтдыла.
Джангы Джёгетейни орта школуну директору Ёзденланы Борис да: «Кеслери окъугъан школну къабыргъасына тагъылгъан мемориал къангала бу джигитлени атларын ёмюрлюкге сакъларгъа джарарыкъдыла. Аланы кюн сайын кёре ёсген сабийлени да патриот сезимлери уянныкъды», – деди.
Джыйылыуну ахырында анга къошулгъанла мемориал къангаланы къатларына гокка хансла салыб чачылдыла.
БАЙРАМКЪУЛЛАНЫ Зульфия.
