Хыйлачы тиширыу, сабийни энчи хапарын билир ючюн, устазча, аны электрон дневнигине кирирге излегенди.

Арт кёзюуде кеслерин билим бериу санагъатны къуллукъчуларына санатдырыб, ётюрюк бла сохталаны, аталаны-аналаны энчи хапарларын билирге излеген хыйлачыла кёб болгъандыла.
Ма, кёб болмай, полициягъа 41 джыл болгъан бир тиширыу тарыгъыу къагъыт джазгъанды. Ол айтхандан, аны 14 джыл болгъан джашына бир тиширыу къонгурау къагъыб: «Мен гимназияны устазыма, сени электрон дневнигини паролун дженгил огъуна ауушдурургъа керекди», – дегенди.
Ол акъыл-балыкъ болмагъан джашчыкъны ийнадырыб, «Дневник.ру» сайтха киргизгенди, анга джангы пароль салдыргъанды, аны энчи хапары бла хайырланырча болгъанды. Алай а, сабийни аты бла банк карта болмагъанын билгенинде, аны бла кюрешгенни къойгъанды.
Хыйлачыла, адамланы энчи хапарлары бла хайырланыр ючюн, телефон бла сёлешиб, мессенджерле бла джазыб, социал сетледе кеслерин башха адамлача танытыб, ётюрюклени джаядыла, башха лагъымла къурайдыла.
Ала эм бек, пароль, код билиб, Кърал джумушланы порталына, электрон дневниклеге кирирге излейдиле.
Къарачай-Черкесияны Ич ишлени хакъындан министерствосу джердешлерибизни сакъ болургъа, танымагъан, билмеген адамлагъа кеслерини энчи хапарларын айтмазгъа чакъырады. Айтылгъанны юсюнден окъуу заведениени администрациясындан толу хапар билгинчи чыртда джукъ этмезге кереклисин, билим берген учреждениелени къуллукъчулары аллай информацияны телефон бла сормазлыкъларын эсгертеди.

Кумукова Рамиля,
КъЧР-ни МВД-ны пресс-къуллукъчусу.