«Ат – белден, джигит – кёлден» дегенлей, атла бла атлыланы сейир-тамаша оюнлары (джигитовка) керти да уллу къууанч болду республикабызны джамагъатына.

Шимал Кавказ кърал академияны башламчылыгъы бла биринчи кере болуб, бу кюнледе ат оюнладан Республиканы ачыкъ чемпионаты болду. Ол миллетибизни Джангырыу кюнюне эмда Уллу Хорламны кюнюне аталыб, Красный Курган элде академияны илму-окъуу селекция аралыгъы эмда «Аманат» деген атлы спорт клубу болгъан джерде бардырылды.
Ат оюнлагъа къошулургъа, бу сейирликге къараргъа да кёб адам келген эди: атланы, атчылыкъны сюйгенле, джамагъат къуллукъчула, алимле, джазыучула… Къуру республикабыздан болуб къалмай, Эресейни талай регионундан 25 атлы кеслерини усталыкъларын кёргюздюле.
Академияны ректору Къочхарланы Руслан, джамагъатха хошкелди айта, байрам кюнле бла алгъышлаб, келген къонакъла бла танышдырды, ат оюн бизни миллетде эртдеден келген спорт болгъанын да чертди. Гитче Къарачай районну башчысы Байрамукъланы Рамазан, Эресейни Коми Республикадан сенатору Елена Шумилова, Къарачай-Черкес Республиканы эл мюлкюню махтаулу къуллукъчусу, атчылыкъны ветераны Орусланы Къылыч дагъыда башхала джыйылгъан джамагъатны байрамла бла алгъышлаб, атлылагъа джетишимле теджедиле.
Сора башланды сейирлик! Шимал Кавказ кърал академияны «Аманат» деген атлы спорт клубуну спортчулары, Севастополдан, Ростов, Пенза областладан, Ставрополь крайдан келгенле, ат белинде, джер юсюнде айланнган кибик, тамам таукел айланнганлары бла, сейир оюнла кёргюзгенлери бла джыйылгъан джамагъатны кёзюн ачдыла. Джашла бла тенгликде, джаш къызчыкъла да танытдыла ётгюрлюкню. Адамланы сейир этиб къычыргъанлары, харс ургъанлары, атлыланы къара атхан, сюнгю силдеген, къылыч бла кесген тауушлары, атланы джоргъалаб баргъан аякъ тауушлары, бир-бирине «эжиу эте», джырны, тепсеуню усталары кеслерини чемерликлерин кёргюзе, тамам тамаша байрам болду.
Академияны кесини тепсеучюлери, джырчылары да бек аламат концерт кёргюздюле. Алагъа да Ингушетияны, Къарачай-Черкес Республиканы да махтаулу артисти Нальгиева Лема миллетибизни алгъышлагъан да этиб, талай джырны айтыб, къошулгъанында, бютюн да джарыкъ байрам болду. Ат оюндан сора да, тёрт аякълыланы шын да тургъуза, тепсетген да эте, суратлау чемерликлерин да кёргюздюле. Быллай затлагъа къарасанг, арабин, бу джаныуарлада сезимден сора, акъыл да тохташхан болурму, деринг келеди. Кёз кёрмесе, сёзле бла суратлагъан къыйынды, ёзге, къуру ачыкъ чемпионат тюл, мийик дараджада быллай сейир байрам да биринчи кере болду болур республикабызда. Бек кёб заманнга барлыкъды адамланы эслеринде бу тамашалыкъ. Къалай унутурла Орусланы Къылычны 8 джыл болгъан туудукъчугъуну ат белинде сирелиб баргъанланы (эки атлы) имбашларына миниб, къоллары бла джукъдан тутмай, ёрге сирелиб баргъанын…
Олтуруб, сирелиб къарагъанланы саны бу джол бир 3-4 джюз болур эди. Сейир байрамны хапары кенг джайылыб, эндиги джол андан талай кереге кёб боллугъуна сёз джокъду.
Тёрелик этерге Эресейни эм белгили сюдюлери келгенликге, тынч тюл эди игилени ичинден эм игилени чыгъаргъан. Алай болса да, биринчи, экинчи орунну да Къарачай-Черкес Республикадан Шимал Кавказ кърал академияны «Аманат» деген атлы спорт клубундан Сергеев Владимир бла Замятин Николай, ючюнчю орунну Ростов областдан Денис Сидоренко алдыла.
Байрамны аягъында академияны ректору Къочхарланы Руслан къараргъа келген джамагъатха да, атлылагъа, ат оюнну къурагъанлагъа да разылыгъын билдирди.
Журналистле бла тюбешиуде уа Къочхар улу атчылыкъны бизни миллетге бютюн уллу магъанасы болгъанын чертиб, алай эсе уа, адамла тутхан атларындан хайыр кёрюрча амалла къураргъа керекди, деген оюмун да айтды. Сёзден, Шимал Кавказ кърал академияны аграр факультетинде атчылыкъны кафедрасы ачылады. Анга эл мюлк илмуланы кандидаты Джатдоланы Хызыр башчылыкъ этеригин да айтды. Быллай кафедра Эресейде къуру Тимирязев академияда болгъанын эсге алсакъ, ангылашынады дараджасы. Аны кибик, ДНК анализле-баш этдирирча лаборатория, илму аралыкъ, атлагъа къарагъан клиника, кёрмючле, дорхла къурар хыйсаб… Къайсы бирин айтайыкъ… Кёб ишни къолгъа алгъанды Къочхар улу, аны къатында адамла. Бу башламында да бет джарыкълы болсун.

КЪОРКЪМАЗЛАНЫ Салима.